“Toute vie veritable est rencontre” (toda vlda verdadera es enkontro).
Ke kijo ekspresar Martin Buber kon estas palavras ke para munchos de entre mozotros paresen ser un djenero de mensaje profetiko?
De su parte, Rabbi Abraham Joshua Heschel mos dize aproksimativamente lo sigyente: “Un ombre relijyozo es una persona ke en su esprito guadra en mizmo tyempo ‘Dyo i el Ombre”, ke guadra en su memorya la persona ke sufre del mal ke es echo a otros, la persona de lakuala la pasyon la mas grande es: ‘la kompasyon’ i la fuersa la mas presyoza: ‘el Amor’.
“Amar es saver dar i resivir en mizmo tyempo” mos ambeza a su torno ‘Alain Finkielkraut’.
Puedemos mozotros adjuntar: “Amar es bivir realmente o mas prechizamente, salir de muestro ego i ir en direksyon del ‘otro’ afin de arrankarlo i en mizmo tyempo arrankarmos de esta vyeja enemiga de kualkyer ‘ser humano’ ke es la indiferensa.”
Desde un pasado byen leshano el Ombre dezea saver lo mas posivle al sujeto del grande misteryo de la vida en su diversidad no solo fizika o intelektual, ma partikularmente afektiva; el se esforsa de entender lo ke es ‘el otro ke si mizmo’ i esto afin de pueder deshifrar la verdadera sinyifikasyon de su propya prezensya sovre un tyerra ke parese kerer arrondjarlo kon despresyo.
Las kestyones a este sujeto kedan syempre sin repuesta. Salvo la relijyon ke jeneralmente es el ultimo refujyo en kavzo de dezespero, el ‘ser humano’ sin fey ni kreensa se topa fatalmente en un espasyo vazio, tal una esfera de ‘no ser’.
Al pareser el djudaizmo, en su esensya mizma, es una relijyon mas rezya ke otras, porke el no es ‘inamovible’, no atado irreversivlemente a dogmas infleksivles a los kualos en diferentes otras kreensas es interdido de tokar.
Okure mizmo ke en varyos pasajes de la Biblia vemos sentensyas ke se kontredizen las unas las otras; por egzempyo al empesijo meldamos ke ‘la kulpa de un pekador se reflekta sovre sus desendyentes durante syete jenerasyones’ i mas leshos en el livro de los profetas meldamos lo sigyente: “Ken vos disho ke el padre pagara por el ijo, o el ijo por el padre? Kada uno pagara solo por sus propyos pekados.”
Ma revineremos al sujeto inisyal: Si, komo lo meldatesh mas arriva, Martin Buber disho: “Toda verdadera vida es enkontro.”
En su livro entitolado “Martin Buber sentinelle de l’humanité” Dominique Bourel lo kualifiko ansi:…inmenso pensador djudyo ke fue en mizmo tyempo filozofo, psikologo i tambyen historyano de relijyones, komentador i traduktor de la Biblia, promotor de la kultura djudia, fundador de una Universidad ansi ke defendedor del kavzo arabo i vizyonaryo politiko, ets…ets…
En efekto, el fue un grande djudyo de la primera mitad del venten siglo ke manifesto un amor partikular por los kuentos hasidikos i ke kon su teoria del “Yo i Tu” fue uno de los mas konosidos filozofos del venten siglo.
Martin Mordehay Buber nasyo enel anyo 1872 en Vyena en una famiya djudia ke (aun syempre sinseramente atada a su relijyon) era mas o menos asimilada a la atmosfera intelektual del payis...
Su avuelo (en la kaza delkual el bivyo en su chikes) era un savyo espesyalizado en literatura i tradisyones djudias. Ansi su inyeto resivyo una edukasyon kompleta kaji poliglota; se avlava Yiddish i Alman en kaza i ainda ninyo, el se ambezo tambyen el Hebreo, el Franses i el Polonezo,
En 1892 Martin Buber retorno a la kaza paternal ande se produzyo en el un djenero de kriza relijyoza ke lo pusho a alesharse por un syerto tyempo del Djudaizmo i a estudyar Kant i Nietzsche ansi ke en 1896 la filolojia Almana i la Historya del Arte.
Es verdad ke en 1898 el adhero al movimyento Sionisto, ma al empesijo no fue por razones politikas ni relijyozas ma kulturales. Es mas tadre ke Martin Buber devino progresivamente un myembro aktivo del dicho movimyento del kual portanto se alesho por un syerto tyempo a la sigida de un dezavenimyento kon Theodor Herzl.
En el anyo 1902 el grande filozofo edito la revista Sionista “Der Jude” ke devino poko despues la mas selebre del partido en kestyon.
İ en 1903 el deskuvrio el “Hasidizmo” ke lo pusho en 1904 a retirarse del movimyento Sionisto para konsakrarse enteramente a la redaksyon de muevos livros.
Ansi en 1906, Martin Buber publiko un teksto sovre Rabbi Nahman de Bratislava, i en 1908 “La leyenda del Baal Shem Tov , fundador del Hasidizmo”, lo ke avyo las puertas a su selebre kreasyon: el “Yo i Tu”, ovra de la kuala vamos avlar a la semana ke vyene.
A kontinuar...
