En el Şalom de la semana pasada 17/2/2016, meldimos kon un immenso plazer mesklado de un poko de tristeza, la buena opinyon ke varyas personalidades muzulmanas i tambyen estranjeras tyenen al sujeto de los myembros i partikularmente de los dirijentes de muestra komunidad, la kuala malorozamente se enchikese de dia en dia mas.
Komo es de mezmo el kavzo para otros payizes del mundo, ay nombrozas partensyas de la manseves en direksyon de muevos horizentes; kon el tyempo syertos de entre eyos retornan o retornaran a sus patria de nasimyento, otros por kontra kedaran en sus muevo payis de akolyo.
Ma esto dicho, revineremos al empesijo del primer paragrafo de este artikolo. Es inkontestavle ke: kon su maraviyozo Liseo ke de anyo a anyo obtyene de sus elevos rezultados progresivamente mas altos… Kon su Hospital kontinualmente renovelado grasyas a la jenerozidad de sus varyos donatores i sus valorozos medikos muy atentivos en sus diagnostiko…tambyen, kon sus muevos adjuntamyentos de ovras kaji similaryas en sus aktividades, tal el del ‘Azilyo de Hasköy kon el Barinyurt’… kon sus Mishne Torah, Orfelinato, Matan Baseter ansi ke sus multiples otras aktividades relijyozas i karitativas ansi ke kulturales, artistikas i rekreativas, muestra Komunidad es komo un refujyo kayente i muy plazyente para kada uno de sus myembros.
Dezeo por seguro avlarvos de todas estas ovras i de sus varyas aktividades, ma sin dubyo otros eskritores ke por seguro las konosen muncho mas ke mi, lo azeran de una manera mas perfekta. Yo personalmente me vo permeter de avlarvos unikamente de la Matan Baseter, ovra en lakuala tuve en el pasado una syerta aktividad en mi kualidad de myembro del “Grupo Ester Tani” al kual yo avia partisipado ay de esto mas de 50 anyos.
Kale aver visto lo ke eran a esta epoka las kalejikas ke se topavan serka de la Kula…kale aver entrado en syertas de estas moradas a mitad destruidas, aver suvido las eskaleras medyas rotas, kon sus rampa ke se meneava komo una kuna i sus eskalones rotos de los kualos salian munchas vezes varyos insektos i partikularmente bestyas (no muy agradavles a ver) para entender lo ke fue i lo ke es aktualmente la evolusyon del lavoro de asistansya karitativa de muestra komunidad.
Oy, los esforsos de solidaridad son los mizmos ke los de akeya epoka, kon el mizmo ritmo i el mizmo esprito de fraternidad ke desde un pasado muy leshano es el propyo del puevlo djudyo.
Konsernando la Matan Baseter aktual, me alegro de konstatar su inkontestavle desvelopamyento i los esforsos flagrantes de sus myembros de ser syempre en kontakto kon los ke resiven asistensya, i esto, syempre kon takto i respekto resiproko.
Regularmente, 300 famiyas son vijitadas kada mez por un grupo de jovenes humanitaryos de la mizma ovra, loskualos les konsakran kon plazer unas kuantas oras de sus tyempo de libertad para yevarles asta sus kazas: en desparte de un ayudo monetaryo lo mas konsistyente posivle, paketos de komanya ke kontyenen kada uno 17 o 18 produktos esensyales de nutrisyon, i de mas ‘gayna’ i ‘karne’.
Por informasyon: las 300 famiyas en kestyon son kompuestas de aproksimativamente 700 o 750 personas.
Las damas de la Matan Baseter se azen a sus torno un plazer de vijitar a lo manko una vez al mez kada kaza, avlar kon los myembros prezentes i diskutir kon eyos en kavzo de problemas difisiles a rezolver.
Es evidente, ke en sirkunstansyas de desrepozo de salud, eyos son immedyatamente resividos i kurados grasyozamente, syempre kon el maksimum de kudyo, en el Hospital Or-Ahayim.
En los grandes Muadim, en desparte de una suma de moneda suplementarya, kada famiya resive muevas ‘ropas interyores’ (iç çamaşırı) para kada uno de sus myembros, savanas i tovajas de puerpo ansi ke platos de komida gizada; i kada anyo al empesijo del invyerno, kalsados muevos adekuados a kada uno. les son asegurados.
Los medyos materyales para asegurar la realizasyon de este ermozo programa karitativo son asegurados grasyas a grandes donasyones de myembros jenerozos de muestra kolektividad ansi ke del revenido de kartas de felisitasyon o de kondolensas mandadas a la okazyon de diferentes sirkonstansyas i byen entendido prinsipalmente grasyas al “Katering Kasher”… Kaji la totalidad de los grandes pransos de alegria, bodas, Barmitsvas ets… De muestra komunidad son aparejados por este servisyo debasho una absoluta sorvelyansa relijyoza.
El adreso elektroniko del katering es el sigyente: [email protected]
Por informasyon: Esta mizma organizasyon prokura paketos de komanya Kasher a la kompanyia “Doco T.H.Y.”
Si… son presyozas las aktividades de muestra ermoza komunidad.
