Komo ya fue dicho dos o tres vezes en mis artikolos presedentes a este mizmo sujeto, despues su enkontro kon la trupa de teatro hasidik Yidish, Franz Kafka tomo konsyensya de su pertenensya a la Fey i a la Ethika de Moshe Rabenu, lo ke lo pusho a meldar livros sovre la historya i la kultura del Djudaizmo ansi ke tambyen ‘la Biblia’, los primeros tyempos en Alman i relativamente poko despues en Hebreo, lingua ke desde el anyo 1917 el empeso a estudyar kon grande interes.
A la epoka de su Barmitsva el no konosia esta lingua i se avia kontentado de resitar (sin entenderlo realmente) un teksto ke lo avian ovligado a ambezarse de kavesa. Ansi, es mucho dospues ke Kafka dezeo estudyar la dicha lingua grasyas a su amigo nombrado ‘Langer’ el kual kontinualmente le avlava del Hasidizmo. De otra parte Felice (su novya de la epoka) le avlo a su torno de las konferensyas de G. Scholem, el kual dava muncha importansya a ‘un retorno a la lingua hebraika’.
El fakto de estudyar el Hebreo, lingua fundamental de muestros antiguos ansestros permetyo a Franz Kafka de meldar i entender pasajes de la Torah ansi ke los selebres komentaryos de Rashi.
Una otra razon tambyen eksplika el dezeo del grande eskritor tchekoslovako de byen konoser la lingua hebraika: ‘su adhezyon al Ideal Sionisto’ en el anyo 1917 data de la ‘deklarasyon Balfur’ a partir de la kuala el Sionizmo no paresyo mas ser una utopia ma una Realidad.
Los djudyos de esta epoka tenian entonses una vizyon mas o menos mistika del sionizmo i la partensya en Palestina permetyo a munchos de entre eyos de rekonstruir sus identidad djudia.
Kafka no parvino nunka a realizar su dezeo de realmente mesklarse a eyos, i esto malgrado su retorno al djudaizmo renforsado grasyas a su enkontro kon una otra de sus amigas nombrada Dora Diyamant, la kuala se avia engrandesido en una atmosfera de profundo Hasidizmo, del kual (aun su aleshamyento relijyozo posteryor) eya avia guadrado las tradisyones ke espontaneamente transmetyo al selebre eskritor.
Grasyas a esta mizma amiga, Kafka lavoro kon ardor sovre tekstos tradisyonales i partisipo a ‘korsos de Talmud’ al sujeto de los kualos el eskrivyo lo sigyente en su diaryo personal: “La eskola de djudaizmo es para mi un refujyo de paz en este Berlin ke munchas vezes me parese ser feros”.
A un syerto momento, Dora Diyamant i Franz Kafka izyeron mizmo varyos proyektos de ir tambyen instalarsen en Palestina, proyektos ke malorozamente eyos no pudyeron realizar porke, invensivle en sus dekretos, la muerte fue mas fuerte ke sus dezeo de echar un paso sovre la tyerra ke para mozotros todos es syempre una Tyerra Santa.
Si… Franz Kafka sigyo el itineraryo diametralmente kontraryo al de su padre, El apartenia a la pluralidad de ninyos ke vinyeron al mundo a una epoka ande djustamente los djudyos resivyeron los mizmos derechos ke los otros sitizanos i se sintyeron ansi afrankados de kualkyer inkyetud konsernando sus futuro, sin pensar ke kuando sus ijos ayegaran a la edad de madurez, eyos puedran sentir el dezeo imperyozo de saver egzaktamente kualas eran realmente sus verdaderas raizes.
Segun lo ke meldi en el teksto intitulado ‘Une lecture Juive de Kafka’ del ‘Cercle Bernard Lazar de Grenoble’ dos kestyones son munchas vezes formuladas:
a)Komo kualifikar el djudaizmo de Kafka?
b) Deke en las ovras del grande eskritor tchekoslovako, las palavras: ‘djudyo’ o ‘djudaizmo’ no figuran nunka? Las repuestas fueron las sigyentes:
a) Kafka fue durante toda su vida un individuo ke no apartenia a ningun djenero de persona. Munchos de sus komentadores izyeron de el ‘un atheisto’. Por kontra Max Brod topo en la ovra de su amigo intimo ‘premisyos de la Fey djudia’ ke munchas vezes van mas leshos ke su septisizmo; para Kafka una entidad espiritual (superyor a kualkyer otra koza) egziste, ma mozotros no parvenemos a konoserla.
b) El byervo ‘djudyo’ no figura nunka en sus livros ni novelas porke Kafka kijo syempre dar a sus tekstos una aparensya fantastika i irreal, lo ke djustamente krea una konstante polisemia, lakuala pusha kada lektor a azer su propya analiza.
