Es un fakto muy frekuente ke todo en savyendo pertinentemente ke ‘los dezeos de kada fin de anyo por los dodje mezes sigyentes’ no son portadores de ninguna aksyon realmente pozitiva, mos es difisil de no formularlos. En semejantes sirkunstansyas mi madre dizia “ke mos kosta de azerlo?”
Ansi, sin grande konviksyon, formulo a todos mis lektores i keridos este dezeo: “Ke la mueva aynada sea manko kruela ke la ke esta en partensya, yena esta vez de akontesimyentos ke desmentiran muestro pesimizmo aktual.
Aun la sinseridad de mi suplika, en este momento una kestyon persige mi esprito: "Kual fue el faktor prinsipal ke akoso kon tan grande persistensya la humanidad en el kurto espasyo de los dodje mezes pasados?”.
Kon una frekuensya de mas a mas flagrante, meldamos o oyimos avlar de ‘faktos de kriminalidad’ i de ‘asaltos barbares’ de parte de fanatikos obskuros, ansi ke tambyen de ‘perversidad seksual’ o de ‘kovdisya monetarya’ atribuidos a dirijentes de payizes klasados entre los mas sivilizados del mundo.
En los dos ultimos kavzos, komo eksplikar ke personas intelijentes i kultivadas, konsyentes ke sus aktos anti sosyales kavzaran sus propya dekadensya, perpetraron semejantes faltas de moralidad? Es ke ay en el ombre (konsiderado komo la sola kriansa realmente pensante i ansi garante de sus aktos) un djenero de instinkto negativo de oto-destruksyon?
Komo tambyen eksplikar el shifro kreshendo de suisidyos de jovenes entre 16-21 anyos, en esferas jeografikas muy adelantadas en el progreso syentifiko? Todos savemos ke “el suisidyo es la viktorya de la dezesperansa kontra la maraviyoza sertidumbre ke kada uno de entre mozotros es una entidad humana libre i responsable de su ‘ser’? El suisidyo es la vida ke se enkorva delantre la muerte.
Komo enfin eksplikar lo ke meldi en el diaryo elektroniko franses “Le Monde” de vyernes pasado, el triste, muy triste akontesimyento ke se produzyo en un espasyo djudyo de Sisjordania?
Segun lo ke este diaryo eskrivyo: “Myerkoles 23/12/2015 el posto İsraelyano “Chanel 10” transmetyo el imajen shokante de una boda de haredim ekstremistos selebrando sus fyesta en baylando i burlandosen de la muerte del bebiko muzulmano “Ali Dawabsheh” kemado bivo bivo kon sus paryentes a la sigida de un insendyo kriminal provokado konsyentemente en Sisjordania de parte de un grupo de jovenes fanatikos djudyos.
Ay realmente faktos ke no solo mos inchen de repulsyon ma ke tambyen mos azen dubyar de la valor real de la relijyon, i esto es una pedrita inkonmensuravle.
Despues la difuzyon de este espektakolo inyovle, Benyamin Netanyahu izo immediatamente saver ke las otoridades İsraelyanas avrieron una enkuesta a este sujeto i disho: “estas shenas de alegria mostran la verdadera facha de un grupo de individuos ke son un verdadero peligro para İsrael. No semos prontos a akseptar personas ke nyegan las leyes del Estado İsraelyano a las kualas eyas son ovligadas de ovedeser.”
De mezmo munchos otros leaders nasyonalistos ke apartyenen al grupo de partidos favoravles a la kolonizasyon de la Sisjordania denunsyaron igualmente la horor de este fakto i el kapo del parti nasyonalisto relijyozo “Naftali Benet “ deklaro ke se tratava de terroristos de los kualos el eskopo es de destruir el Estado de israel.
Segun la prensa İsraelyana: el Novyo (ke se ve en la video) es un myembro konosido del partido de “ la derecha ektrema”, joven ke fue interojado en el pasado sovre su prezumido rolo en varyos aktos de terrorizmo djudyo i munchos de los kombidados eran amigos o serkanos de los ke fueron sospechados en la trajedia de la famiya “Dawabsheh”.
De su parte el Shin Beth (servisyo de la seguridad interyor İsraelyana) disho: “los ke fueron arrestados en el kuadro de esta enkuesta son por la mas parte “jovenes sospechados de apartener a una organizasyon terrorista djudia i de aver perpetrado aktos kriminales.
Ansi personalmente, so segura ke ‘la aspirasyon la mas intensa de munchos de entre mozotros’ es de ser syempre fideles a las preskripsyones de moralidad i a la maravioza Ethika de muestra relijyon, sin nunka kaer en el fanatizmo destruidor.
