Benyamin Netanyahu anulo la vijita de Donald Trump en Israel

Klara PERAHYA Judeo-Espanyol
16 Aralık 2015 Çarşamba

En la Amerika del Norte,”Vijitar İsrael” es munchas vezes la kostumbre de los kandidatos  a la futura  investitura prezidensyal  de los Estados Unidos, lo ke kon grande frekuensa les es muy avantajozo para obtener muevos votos de parte no solo  de los djudyos, ma tambyen de los ke son en jeneral  partizanos de İsrael.

Ansi, el rikisimo Donald Trump formulo su dezeo de ir a Yerushalayim el 28 del mez koryente, ma eskandalizados por la yamada de “interdir a los fideles muzulmanos el akseso a los Estados Unidos” kel multi milyardero formulo despues el muy triste akontesimyento de San Bernardino en Kalifornia, munchos deputados İsraelyanos demandaron a Netanyahu de anular la vijita en İsrael del dicho kandidato Republikano.

Las  palavras indjuryozas  kontra “el Islam” del  pretendente a la prezidensya de la Potensya la mas adelantada del mundo en la evolusyon syentifika i ekonomika, produzyeron en munchos payizes realmente sivilizados  i partikolarmente en İsrael, una dezastroza impresyon de negativizmo  dirijido no solo kontra  personas kulpavles, ma kontra la dinyidad de milyones  de ombres i mujeres por la mas parte inosentes,eyos mizmos revoltados i moralmente feridos   por  los aktos kriminales de una minima fraksyon de sus korelijyonaryos. 

Azer kualkyer amalgama  entre  ‘un horrivle punyado de terroristos asedados de sangre ke se enganchan a uno de los posivles  paragrafos del  Koran eskritos  aproksimativamente en este sens ay de esto siglos i siglos’ i ‘la totalidad de una populasyon fidel a sus fey’ es un akto absurdo no solo intelektualmente  ma  tambyen espiritualmente.

Todo komo el Koran Muzulmano, la Biblia Djudia  i el Evanjilyo Kristyano  tyenen tambyen sus kapitolos obskuros ke reflektan munchas vezes  la tekstura sosyo-kultural de la epoka ande  fueron eskritos, dias ke eran leshos, muy leshos de ser semblavles a los  muestros.

Ansi, konvensido por las vehementes protestasyones de sus sitizanos  kontre las estupidas palavras del kandidato republikano a la prezidensya de los Estados Unidos,  Benyamin Netanyahu anulo la vijita en İsrael del dicho sinyor, lo ke es komo una konfirmasyon de su propyo respekto por todas las relijyones.

İgualmente, poko mas tadre, el ministro Yuval Steinitz adjunto: “Yo so partizano de luchar kontra el feros terrorizmo del fanatizmo radikal, ma en ningun kavzo de un kualkyer arrondjo de muestra parte de los muzulmanos en sus totalidad ke me syento moralmente ovligado de respektar.   

De mezmo, Myerkoles el  9 del mez koryente, el patron de Facebook, “Mark Zuckerberg” fue uno de los primeros a manifestar  su indinyasyon kontra kualkyer  diskorso anti muzulmano absoluto.

İ, sin pyedrer tyempo, el eskrivyo en su sityo “Kerro aunar  mi boz a las ke sostyenen los muzulmanos por la mas parte inosentes de muestro payis i del mundo entero”….Despues los atakes de Paris i el odyo manifestado la semana pasada,  me imajino el nivel de afliksyon de la multitud inosente  de los muzulmanos ke se pudyeron sentirsen   moralmente persekutidos por aktos perpetrados de parte de otras personas...

El disho kaji tekstualmente: “En mi kualidad de djudyo, mis paryentes me ambezaron ke devemos syempre luchar kontra ‘atakes de odyo’ en direksyon de kualkyer komunidad. …Mizmo si no semos el objetivo de semejantes  golpes,  los atakes kontra la libertad i la dinyidad de kualkyer puevlo  tyenen la posibilidad de ferir i danyar mozotros todos …Si  sosh  muzulmanos en este payis, en mi kualidad tambyen de direktor de ‘Facebook’ kero dezirvos  ke sosh i serash syempre ”los byen venidos” en muestro espasyo i ke vamos syempre luchar endjuntos para defender vuestros derechos i krear un ambiente seguro i pasifiko.”

Amen.