Las fuersas israelianas izieron una operasion korajoza para salvar la famiya judiya en la sivdad Alepo de Siria.
La gazeta Jewish Chronicle esta diziendo ke el aparejo para la mision, empeso mezes antes. En primero, un ombre de negosios israeliano-amerikano, Moti Kahana, embiyo un mesaje a la famiya ke keriyan fuyirsen del pais. Mezmo ke el estado en Siria esta muy danjerozo,la famiya se estava espantando muncho de fuyirsen del pais.
Kahana, ke tiene munchas koneksiones kon los rebeles, se ambezo ke la famiya estava en un estado danjerozo, i el se desido de kitarlos del pais, mezmo si keren u no.
Sin avlar a dingunos sovre sus planos, Kahana se dirijo a la IDF para salvar la famiya judiya, komo lo izieron por los judios de Yemen i Etiopia.
Kuando vino el tiempo, tres soldados vinieron a la puerta de la famiya. La madre de 88 anyos de edad, avriyo la puerta, kon espanto ke los soldados de Assad vinieron a tomarlos. Los soldados disheron a las siete personas de la famiya, ke pueden tomar kada uno una validja i ke deven entrar al minibus,i asperar aya.
Kuando el minibus empeso a irse, los soldados les dieron pasaportos sirianos a kada uno, i disheron ke ivan a ser libros en poko tiempo.
El minibus fue aretado en un posto de kontrol de ISIS, ma la famiya fueron kapache de konvenser la garda ke eran refujiados ke kerian fuirsen de Assad. La garda fue tan empresionada de sus afirmasiones, ke telefono a los otros postos de kontrol, diziendoles ke deshen pasar el minibus.
Les tomo trenta i sesh oras para pasar los sienes de kilometros, i arivar a la frontiera de la Turkiya. Una vez afuera de Siria, se fueron a una kaza alkilada en Estambul, ande Kahana los estava asperando.
Los problemes no aviyan eskapado dainda.
Gilda, una de las mujeres de la famiya, era kazada kon un ombre muslumano, i se aviya konvertido al Islam.
Entremientes el resto de la famiya resivieron identidades israelianas i se enstalaron en Ashkelon.
La Ajensia Judiya enformo Gilda, ke las personas ke se konvertieron a una otra relijion afuera del judaizmo, piedren el derecho de konvertirsen de muevo al judaizmo.
Segun Kahana, Gilda i su marido preferaron de tornar a Siria, en lugar de kedarsen en un kampo de los refujiados de Siria en la Turkiya.
Kohana disho ke dainda el esta penando para kitarlos de muevo de Siria, ma no esta muy optimisto sovre una segunda operasion.
“Esto muy inyervozo kon elSohnut”, disho Kohana al Jewish Chronicle. “Disheron ke la mujer no era sufizamente judiya para mozotros’.
Un reprezantante de la Ajensia Judiya konfirmo ke Gilda i su marido no puediyan azer aliya, porke Gilda se aviya konvertido al Islam, i ke el Ministerio del Enterior dio el orden final sovre este kavzo
