Aun ke 3 semanas antes ya eskrivi al sujeto de este terrivle akontesimyento ke fue la muerte de “Yitshak Rabin”, no me puedo detener oy de revenir una segunda vez sovre la desgrasya ke avia sido el akto salvaje de este mansevo djudyo, estudyante en Syensya Juridika, el kual (bazandose sovre tekstos antiguos eskritos en un konteksto sosyo-kultural absolutamente diferente del de muestra epoka) kumplio el djesto fatal de travar sovre el ke fue el heroe de la konkluzyon del “Akordo de Oslo”, fakto ke avia avrido la puerta a la kreasyon de un futuro Estado Palestinyano sovre las tyerras de la antigua Juedeo Samaria.
Del avizo de uno de los ke komentaron este kavzo, Yitshak Rabin, dyez mezes antes de su muerte, avia deklarado en la Keneset ke por el momento el pensava a una ‘Entidad palestinyana inferyor a un Estado’.
El mizmo komentador disho tambyen ke (malgrado ke era muy difisil de endevinar lo ke el Primer Ministro de entonses tenia en la kavesa) munchas personas afirmaron ke Rabin penava a evitar de pronunsyar la ekspresyon “Estado Palestinyano” porke el tenia el presentimyento ke psikolojikamente una parte de la populasyon djudia de su payis no estava pronta a akseptar una idea ke era totalmente tabu a esta epoka.
Yitzhak Rabin fue un grande gereador al empesijo kuando la populasyon djudia devia defenderse kon armas en la mano afin de konsolidar por syempre la baza egzistensyal del Estado İsraelyano. İ de mezmo el fue un grande Ombre politiko en esforsandose de entender su adversaryo afin de pueder konvenserlo i ayegar ansi a un punto de entendimyento mutual.
Aktualmente, syertos analistos politikos bushkan los puntos komunes ke puedran egzistir entre Yitshak Rabin i Binyamin Netanyahu.
Ay poko tyempo de esto, en uno de sus diskorsos delantre la komisyon parlamentarya de “los Echos Estranjeros i de la Defensa”, Netanyahu deklaro ke el es kontra un grande Estado Binasyonal, ma ke “por kavza de la situasyon de mas a mas kritika ke ay en este momento en la rejyon, İsrael devra kedar en Sisjordania por un syerto tyempo.
Del avizo de nombrozos otros komentadores, el Primer Ministro pensa ke İsrael devra syempre bivir kon la espada a su lado, lo ke signifika ke el Estado Hebreo devra ser eternalmente en estado de defensa i de akavido, sin nunka renunsyar a utilizar la fuersa afin de protejarse.
El Sinyor Oren (ke fue por un tyempo embashador de Israel en los Estados Unidos) afirma ke Benyamin Netanyahu era super-seryozo en los presedentes siklos de negosyasyones en favor de la Paz, ma ke oy uno de los mas importantes elementos de su vizyon es ke es difisil de ayegar a una situasyon de verdadero akordo todo el tyempo ke egzistera el refuzo palestinyano de akseptar el Estado Hebreo komo “Estado İsraelyano del puevlo djudyo”.
En efekto, ay poko tyempo, el aktual Primer Ministro İsraelyano insistyo ke :”No solo los Palestinyanos refuzan de rekoneser İsrael komo un Estado Nasyonal djudyo, ma ke eyos no keren meter fin definitivamente al konflikto afin de no renunsyar a sus intenso dezeo de un retorno a Akko, Haifa, Yafo i otras sivdades İsraelyanas.
Syempre segun Netanyahu: los Palestinyanos no estan prontos a renunsyar al dezeo de “un Estado Palestinyano no al lado de İsrael ma a su lugar”. Eyos ensenyan syempre a sus ijos i ijas a detestar los djudyos i a konsiderar “İsrael” komo un payis kolonyalisto responsavle de todos sus males.
Es puede ser por esto ke el primer Ministro aktual İsraelyano todo en afirmando su apoyo a una solusyon a dos Estados i todo en dezeando syempre muevas negosyasyones de Paz kon la autoridad Palestinyana, se obstina a deklarar ke durante el egzersizyo de su governo no avra un retrakto importante de las fuersas İsraelyanas de Sisjordania, lo ke sinyifika: “Si” a un Estado Palestinyano lado kon lado kon el Estado Djudyo, ma absolutamente en una atmosfera de real dezeo de paz.
