El Pintor Fransez LEOPOLD LEVY en Estambol (1882-1966)

Şeli GAON Judeo-Espanyol
28 Ekim 2015 Çarşamba

Kontinuasion del rezumen de mi konferensia del 20.10.2015 en el Lise Notre Dame de Sion:

 

Nadia Murat, profesora de matematika en mi eskola, el liseo de Notre Dame de Sion, desde 32 anyos, me ofresio la foto de una akuarela de Leopold Levy: - Tengo en mi salon un tablo de Leopold Levy.  Esti, por siguro te gustaria de verlo... Es un regalo de mi tio Bernard Liberman, ke era un profesor de matematika en el liseo Galatasaray i en la eskola Franseza Saint-Benoit. Rengrasiamos Nadia por la foto de una ovra akuarela de Leopold Levy...

Léopold Lévy en Estambol (1936-1949)

En 1936, Istanbul Güzel Sanatlar Akademisi (La Akademiya de Bellos Artes de Estambol) invita Léopold Lévy para dirijar su Departamento de Pintura. El maestro reorganiza esta seksyon, aktualiza el ensenyamyento i krea un Atolye de Gravura.

Su prezensya en la Turkiya en los anyos de la Sigunda Gerra Mundial, le asigura salvasyon del Olokosto. En akeyos tyempos desgrasyados, munchos profesores i ombres de sensya de muestra relijyon (mas o menos 200)  fueron resividos en muestro payis. De sus parte, estas personas de fama internasyonal, izyeron elevar el nivel de la Universidad de Estambol i otras institusyones ande lavoraron.

Preparandome a dar una konferensya sovre Léopold Lévy, enkontri su eleva, la Sra. Leyla Süren, ke poseda una rika koleksyon de sus ovras. En konversando kon eya, me konto ke organizava munchas ekskusyones, kon un grupo de elevos, a la Isla “Prinkipo” (Büyükada).  Estos paseos le prokuravan la okazyon de ensenyar la estetika i las tres kolores inisyales. Les aziya admirar el amariyo fosforesente de las mimozas, el kolorado resplandesyente de las adelfas* i el blu limpido de la Marmara.   

En oyendo ke la pintadora Tiraje Dikmen tambyen era una eleva de Léopold Lévy, fui a verla en Büyükada. Me konfirmo ke el era enamorado de esta isla. Disho: “El Maestro nunka tomava la pendola en la mano para azer korreksyones sovre muestros desenes. Mos ambezava tambyen de mirar el Arte desde su kreasyon. Mos ensenyava syempre de desveloparmos i topar la ekspresyon de muestra personalidad.”

Vijiti el eskritor famozo Rasih Nuri Ileri, ke era un buen amigo de Léopold Lévy. En su salon, pude ver dos de sus tablos ke me amostro kon orgolyo. Me avlo en largo sovre su personalidad elegante i delikada.

Estas alavasyones me emosyonaron i me alegraron.

En los anyos ke paso en la Turkiya, Léopold Lévy reorganizo el Muzeo de Pintura i Eskulptura ke iva ser avyerto por Atatürk, kreo una biblioteka en Güzel Sanatlar, dyo konferensyas en Istanbul, Ankara i Beyrut, ande fue invitado. Produsyo munchas ovras personales, alkansando una grande maturidad, ke se ve en sus “Portretos”, “Nudos”, “Peyzajes”, una multitud de pinturas de kolores al olyo i akuarelas, i una importante gravura del Bosforo. Esta gravura fue enkomendada para la inaugurasyon del Opera de Ankara.

En 1949, torna a Paris, regalandomos Neşet Günal, Hikmet Onat, Sabri Berkel, Nurullah Berk, Nazmi Ziya, Bedri Rahmi Eyüboğlu, ets., los grandes pintadores Turkos. Ayi kontinua su karyera, pintando i ekspozando sus ovras. Pasa peryodas en Provence, ande alkila durante dos anyos, el atolye de Cézanne. Lavora los enveranos serka de Ciotat, los invyernos en Horfleur i Dieppe. Despues de 1956 asta su muerte en 1966, Léopold Lévy pinta 150 tualas mas, en un estilo renovado, diferente de sus ovras anteryores.

* adelfa: (Ing.) Oleander, rosebay; (Fr.) Laurier rose; (Esp.) Adelfa; (Tr.) Zakkum.