El Pintor Fransez LEOPOLD LEVY en Estambol (1882-1966)

Un rezumen de mi konferensia del 20.10.2015 en el Lise Notre Dame de Sion

Esti SAUL Judeo-Espanyol
21 Ekim 2015 Çarşamba

Kon un sesto de las primeras frutas, i la baklava de mansana: Vos sueto Shana Tova

Léopold Lévy sugjerava:

“Para ekspresar una ovra artistika, lo importante no es lo ke vemos, sino lo ke keremos ver.

Empesad en alimpyando vuestras paletas: Bastan el amariyo, el blu i el kolorado para krear o reprodusir la gama entera de kolores.”

Artista ke amava sorprender, se surpaso kuando teniya solo 18 anyos, en los anyos 1900, kon su ovra entitolada “La Porte” (La Puerta), (perdida desde entonses), El pintador Matisse invito Lévy a partisipar kon este tablo, en la ekspozisyon de pintura ke estava organizando i ke iva tener lugar en Paris, en el “Salon des Indépendants”,

Este tablo remarkavle i diferente, kon su estruktura orijinal, fue ekspozado en el lugar el mas en vista. Entereso los kritikas de arte i los entelektuales, komo el poeta Charles Baudelaire, ke lo enkorajaron por sus ideas de “bushkar konseptos muevos i no reproduzir lo ‘déjà vu’”.

Su vida

Nasyo el 5 de septembre, 1882, en Paris, el benyamin de tres ermanos, ke eran todos muzikantes. Su padre era un industrialisto afisyonado del Arte de Pintura. Léopold avryo sus ojos en una kaza kon paredes ornadas de una rika koleksyon ke konteniyan una ovra de Corot i dos de Courbet. Empeso a pintar a la edad de 13 anyos i realizo una reproduksyon del peyzaje de Courbet, reflektando la kolor i la luz de las kostas Mediterraneas.

Vizitava akoruto el Muzeo del Louvre. Despues de la muerte de su padre, en 1897, kon la instigasyon de su triste madre, estudyo los Artes Dekorativos. Komo estudyante libre de la Eskola de Bellos Artes, lavorava kon modeles, tambyen pasava oras enteras en las bibliotekas.

En 1905, enkontro el pintador Florentin Linaret (muerto a los 24 anyos), ke fue el artista ke lo influenso lo mas. En los mismos anyos, enkontro el eskulptor Charles Despiau, kon ken partajo una grande amistad, fina 1936, en ke vino a la Turkiya.

En Paris, frekuenta los artistas mansevos. A partir de 1907, para ganar su vida, lavora en el atolye de gravura de Worms (amigo de Camille Pissarro), todo en kontinuando a pintar. En 1909, se ambeza, del Maestro Heyman, mas sovre el Arte de Gravura, en el kual eksela. De 1914 asta 1918, partisipa en la Primera Gerra Mundial.

En 1919, va al sud de la Italya i de la Fransya, i sigue indose kada enverano. Produse los dos tyersos de sus ovras ayi. Aze una seriya de ekspozisyones, tambyen en el Salon d’Automne.

Entre 1927-1936, se instala en Aix-en-Provence. Ayi frekuenta munchos artistas importantes i avre numerozas ekspozisyones.