Sukot

Rav Yeuda ADONİ Köşe Yazısı
30 Eylül 2015 Çarşamba

Ansi es endikada la fyesta de SUKOT.

El Kriyador le enkomenda a Moshe Rabenu dizyendo: “Avla a los ijos de Israel dizyendo a los kinze diyas de este mez, sera la fyesta de las kavanyas por syete diyas a El Kriyador. En el primer diya sera yamedura santa, no agash ninguna ovra de sirvisyo. Syete diyas fyesteresh la fyesta. Tambien el ochen diya no agash ninguna ovra de sirvisyo. En el kinze del mez seteno, kuando ovyeresh akojido el renuvo de la tyera, azesh fyesta a El Kriyador syete diyas. En el primer diya avra olgansa, i en el diya ocheno avra olgansa. I tomaresh para vozotros en el primer diya el fruto de arvol ermozo(etrog), rama de datile (Lulav) i rama de arvoles espesos (Adas-Murta) i ojas ke kresen en aroyos (arava). I vos alegraresh delantre de el Sinyor de el Mundo syete diyas. I lo azesh fyesta a El Kriyador syete diyas en el anyo. De syempre sera por vozotros i por vuestros ijos. Todo el puevlo Djudyo vos asentaresh i moraresh en kavanyas. Para ke sepan vuestros desendyentes ke en kavanyas yo ize morar a los ijos de Israel, kuando los kiti de la tyera de el Ejipto”.

La fyesta de Sukot nos enbeza ke el manparador nuestro es El Kriyador. Entrando a el invyerno ke todos tornar a sus kazas.

Nozotros deshamos nuestras kazas i moramos en la kavanyas. (SUKA). El tyempo ke ya se arekojo todo el produkto, pensamos i kreyemos todo apartyene a El Todo Poderozo.

El es ke nos rengrasyo kon todo lo bueno ke nos dyo. El techo de la Suka no deve ser muy alto. Alsando los ojos a el Techo de la Suka entre la ojos i mos el syelo i nos akodramos ke es el ke nos da todo lo bueno a nozotros.

Tanbien los kuatro jeneros de produkto ke tomamos por orasyonar en el diya de Sukot, el etrog-el lulav- la murta(adas) i la arava senbolizan la unyon de el puevlo Djudyo, i la unyon de la famiya Djudiya; valorozo, poko valorozo, sin valor. Kada uno tyene su valor. A ningunos no puedemos desechar. Todos semos ermanos, i apartenemos a un puevlo. Devemos de onorarmos unos kon otros i amarmos por ke semos ijos de un padre de El Kriyador el Grande.

Hag Sameah.