Un puerpo de ninyo sin vida sovre la oria de mar de Bodrum

Klara PERAHYA Judeo-Espanyol
7 Eylül 2015 Pazartesi

“La simple fotografia del puerpo inerto de un ninyo de 3 anyos ke las olas deskavenadas de la mar echaron sovre un pedaso de tyerra, serka de las habituales festividades de Bodrum” parese aver despertado la sensibilidad i en mizmo tyempo la konsyensya de miles i miles de personas en el mundo.  

Es verdad ke los governos jeografikamente mas o menos serkanos del payis ande se pasan las mas dolorozas trajedias, se esforsan tal la Turkia de akudir la mas parte de estos desfortunados… Estambol mizmo esta yeno de refujyados siryanos, los unos kon paketos elegantes en las manos, los otros la mano tendida asperando un chiko ayudo suplementaryo de los pasantes..

Aun sus propyos problemas ekonomikos, payizes evropeos ke tyenen una oria sovre la mar Mediteranea miran tambyen de resivirlos para darles pasaje en direksyon de otros lugares mas poderozos.

Revinyendo al puerpo sin vida topado en Bordum , segun las informasyones ke dyo el padre (uniko reskapado de la famiya) el ninyo se topava kon sus jenitores i su ermano poko mas aedado en una de estas vyejas mahonas medyas rotas kon las kualas munchos fujitivos miran de fuir la desgrasya de sus payis de orijen.

El dezmazalado ombre konto ke al empesijo del nofraje, el avia tomado en sus brasos sus dos ninyos pensando ansi salvarlos, ma a un syerto momento, rendyendose kuento ke poko mas leshos su mujer se estava aogando, el kijo akudirla tambyen i ansi malorozamente se preokupo manko de sus ijos ke se topavan kaji apegados a su pechadura, lo ke fatalmente provoko la pedrita por syempre de sus tres keridos.

Si… ‘la historya de este drama i partikolarmente la fotografia del ninyo ke paresia ainda bivo durmyendo debasho el sol kemador’ provokaron en munchos lugares del mundo una emosyon kolektiva mas fuerte ke kualkyer razonamyento intelektual. İ es muy provable ke a un syerto momento fueron murmuradas estas tres palavras dichas despues la Shoha: “Mas Nunka No”.

Shabat pasado miles i miles de sitizanos fransezes manifestaron partikularmente en Paris en favor de un mas grande resivo de los ke, afin de fuir la muerte i la ambrera, demandan avrigo a sus payis.

La Almanya i la Austriaka avyeron grandes sus puertas para resivir lo mas posivle de refujyados.

Ke puede i “sovre todo ke deve” azer de mas la Evropa, kontinente situado al Norte de la Mar Mediteranea al kual inkumbe de azer un mas grande esforso de solidaridad humana? El fakto es ke por el momento son pokos los payizes ke se esforsan de ayudar, kuando es la totalidad ke deve absolutamente azerlo.

Segun lo ke meldi en la prensa: En este momento, lo mas importante es la kreasyon dc sentros de resivo i tambyen de seleksyon entre los ke vyenen …El primer de estos sentros avrira sus puertas a la fin del mez de Septembre en Sisilya….Otros van a sigir asta la fin del anyo 2015.

Es en semblavles lugares ke la Evropa tyene la esperansa de resivir dinyamente los migrantes por unos kuantos mezes i de egzaminar la situasyon de kada uno de entre eyos : “a)Repartir i dirijir los demandadores lejitimos de azilyo b) akompanyar los migrantes irregolares en direksyon si posivle de sus payis de orijen.”

Devo konfesar ke personalmente no parvine a entender egzaktamente la segunda parte de este proyekto, la parte “b”.

Deke mandarlos atras al inferno delkual eyos fuyeron? Es ke no se puede por un syerto tyempo detener los migrantes ke no son regolares en varyos kampos de vijilensya para egzamenes suplementaryos? i mas tadre kuando en sus payis “la ira i la sanya” se kalmaran i ke ansi la situasyon devyendra menos salvaje, lavorar todos endjuntos para topar la solusyon la mas humana?

Por el momento, munchos komentadores politikos dizen ke la pasividad de los Estados Unidos es sorprendyente en una semejante kriza humanitarya.