Es muy interesante meldar artikolos de gazetas viejas kon las ideas de oy, spesialmente si estas gazetas son de 100-120 anyos antes...
“Lo Ke Meldavan Nuestros Padres” kompilado por Rifat Birmizrahi, mos ayuda a respirar un poko de la atmosfera del periodo, kuando la komunidad Djudia aziya parte de la mozaika kultural del Imperio Otomano.
Keridos lektores, vos komuniko lo ke meldi sovre el arte, en la pajina 27 del livro imprimado en 2006:
La ekspozisyon universal de Paris:
Orijin i estimasyones de la ekspozisyon
Fue el 8 de novembre de 1884 ke el prezidente de la republika, sovre un raporto del ministaryo de komersyo.dekrito (desidio) ke una ekspozisyon universal ala kual todas las nasyones seran kombitadas, se avrira en Paris el 5 de Mayo del 1889, i sera serrada el 31 Octobre del mezmo anyo.
El prezidente nominava en mezmo tyempo una komisyon de la kual el objeto seria de bushkar i aparejar los myedos los mas propyos a realizar este gran proyekto.
Fue desidido tambyen, ke la ekspozisyon seria organizada del governo Fransez kon el konkorso de la munisipalidad de Paris i kon la asistensya de una sosyetad de garantia reprezantada del direktor jeneral del “Kredi Funsay”.
Los gastes fueron kalkuladosa 43,000.000 de Frankos El governo partisipara a estos gastes kon 17.000.000 de Frankos. La munisipalidad pagara 8.000.000, i el “Kredi Funsay” el resto.
Esta ekspozisyon tyene benefisyos, el grandisimo numero de personas pagantes ke entran, es una de los mas emportantes, i byen, fue tambyen desidido, ke si avra benefisyos, seran despartidos entre el governo, la munisipalidad de Paris, i el “Kredi Funsay”. Si al kontraryo ay pyedrita: si los 43 miliones no abastaron, entonses el governo pagara el resto por el akavamyento de la grande ovra.
Eyos kalkularon los benefisyos ansi:
Entradas a la ekspozisyon 1.400.000 Frankos
Konsesyones a los eksponantes, i benefisyos diversos 1.000.000 de Frankos.
Vendida del materyel de las fraguas ke van a destruir despues de la ekspozisyon 3.000.000 de Frankos.
Eskojimyento del lugar
Despues de longas diskusyones fue desidido en Agusto 1886 ke la ekspozisyon tyendra lugar prensipalmente enel KAMPO DE MARS i ke puedria al menester espandirse a los entornos.
Una komisyon fue nominada por eskojer los mijores proyektos de fraguas entre los 107 proyektos ke fueron prezentados.
El 12 Djunyo 1886 fueron nominados los direktores i el personel de la ekspozisyon.
Poko despues los ovradores son enpinyados, eyos empesan a aprontar los terenos, kavakan las fondasyones (los temeles), i en las grandes fabrikas de fyerro empesan a la konfeksyon de los djikanteskos fyerros ke atiran oy la admirasyon de los vijitadores.
La ekspozisyon era ya organizada, i oy eya es ya avyerta.
El Telegrafo edision de martes (26 Sivan 5649 - 25 JUNE 1889)
Este livro, tradusido en Inglez i en Turko, esta disponible en Gözlem Estambol, para ofreser, entre tantos otros livros interesantes.
GÖZLEM GAZETECİLİK BASIN VE YAYIN A.Ş.
www.gozlemkitap.com
