Las Ultimas Palavras

Silvyo OVADYA Köşe Yazısı
19 Ağustos 2015 Çarşamba

La semana pasada djueves a la tadre en el sinema d’enverano (ke se realiza en una guerta sin tejado - no se si es muy uzado en la Evropa i las Amerikas ma este modo de guertas anyos i panyos fueron el esensyal del sinema en Turkiya. Malorozamente oy en dia kon todas las fraguas estas guertas fueron destruidas. Oy en dia apartamentos de diez o vente etajes toman lugar en estas guertas) tomo lugar el filmo eskrito por la avokata Rita Ender i filmado por el senyor Yorgo Demir: “Las Ultimas Palavras”. La primera demonstrasyon de este filmo fue realizada en Paris durante la Universitad d’Enverano de Judeo-Espanyol. En empesando mi artikolo kero felisitar Rita Ender por sus esforsos. El filmo empesa kon los funerayes (cenaze töreni) del Judeo-Espanyol. Kero azer la remarka ke ay mas de trenta anyos ke todos keren azer los funerayes de esta lingua. Ma orozamente no alkansan. Mizmo kuando el Şalom, dospues de la epoka de Avram Leyon empeso a ser publikado en Turko kon una oja en Judeo-Espanyol, Naim Güleryüz ke era el ombre ke dio las primeras ideas pensava ke esta lingua se estava muriendo. Ma orozamento todos ke estavan pensando este modo no tuvieron razon, i la lingua kontinuo e ser avlada (a lo manko en muestra sivdad i en la Büyükada). Si tenesh la posibilidad de vijitar muestra isla ande topimos la posibilidad de ver el filmo ya puedesh topar personas de muestra komunidad mizmo de kuarenta o sinkuenta anyos ke avlan en Judeo-Espanyol. La semana pasada kuando me fui al kal avia doz, tres mujeres de la mizma edad ke estavan avlando en Judeo-Espanyol. No era para azermos plazer ke estavan avlando en esta lingua.

Si devemos de avlar sovre el filmo, la Sinyora Ender izo munchos reportajes kon mansevos de trenta – trenta i sinko anyos i les demando los biervos ke les esta vinyendo al tino kuando avlamos del Judeo-Espanyol. La mas grande partida mansyonaron unos kuantos biervos sola una manseva disho ke avla esta lingua. Savesh lo ke me izo plazer ? La sala del Sinema Lale – ke es reelmente muy renomada - estava yena de djente. Kreo ke la mas grande partida era personas de muestra komunidad. Mizmo un mansevo – un İzmirli - kanto una kantika en Judeo-Espanyol i mos konto ke su padre kon sus amigos kantavan kantes en Judeo-Espanyol en İzmir.

 A la fin del filmo los espektadores tuvieron la posibilidad de dar sus ideas i demandar siertas kozas sovre el filmo. No se deke kuando tomi la palavra la Sinyora Ender fue desrepozada de lo ke dishe. “El Judeo–Espanyol komo no fue nunka ensenyado en las eskolas ofisyalmente no fue la lingua de los Sefaradis de Turkiya. Kuando los Sefaradis vinieron de la Espanya en 1492 tuvieron solo mestras (kreshes en kondisyones no muy buenas ma se dava el mizmo nombre a las kreshes ke estavan en buenas kondisiones tambien) i yeshivas; malorozamente no tuvieron eskolas laikes ande se ambezaron sensia. Komparando kon las otras minoridades ke se ambezaron el Grego i el Ermenesko en las eskolas kedaron mas atrazados. Es solo kon las eskolas de la Aliansa ke se fondo en los anyos 1860 i ensenyo la sensya a los djudios ke bivian en tierras muzulmanas komo el Imperio Otomano; la Aljeria; el Maroko i munchos otros paizes…” I eskapi mis biervos en dizyendo ke Yorgo tuvo el mazal de ambezarse el Grego en la eskola i por esto esta avlando en grego kon su ermana. Komo los djudios no tuvieron una lingua i fueron entre tres korasones (i no kuatro – i eskojeron el kuatren) el Judeo-Espanyol ke lo emplearon en kaza i para komunikasyon; el fransez ke emplearon en las eskolas de la Aliansa; el Ebreo ke emplearon para las orasyones; i el Turko ke fueron ovligados de emplearla. Kuando el Govierno demando a la Komunidad ke lingua keren emplear en las eskolas al lugar del Fransez los dirijantes desidieron ke las eskolas ensenyen en Turko.

Sovre estos biervos la sinyora Ender me disho “vozotros savesh todo - ken eramos mozotros? Reelmente no entendi; i kualo kijo determinar? Fin agora no tuvi dinguna diskusyon kon eya ni tuve la posibilidad de diskutir sovre un sujeto? Kontinuo a dizir ke no se todo i ke me puede aklarar sovre siertos sujetos ke se bivio anyos antes en la komunidad. Si me puede aklarar sovre siertos sujetos ke no konosko va ser reelmente muy interesante para mi i esto esperando estos detalyos.