Eske la realizasyon del proyekto “Tel-Aviv sur Seine” fue un sukseso o una desfecha? Ke sera el rezultado immedyato o leshano de esta tentativa de prezentar las doz fachas aktuales del puevlo İsraelyano?
Komo por segura munchos de los lektores de este artikolo ya lo meldarian en varyos diaryos, djuevez de la semana pasada el 13/8/2015, fue realizado en Paris el muy signifikativo proyekto nombrado “Tel- Aviv sur Seine” el kual fue realizado grasyas a la Governadera aktual de Paris ‘Anne Hidalgo’ afin de pushar la populasyon de Fransya a no azer un amalgamo entre, de una vanda: ‘el fakto de la okupasyon de tyerras palestinyanas de parte de nombrozos haredim kon malorozamente la aprobasyon del aktual governo ke el mizmo parese ser ultra nasyonalisto i ultra ortodokso’ i de otra parte: ‘la flangrante sivilidad del resto del puevlo hebreo de kualkyer grande sivdad İsraelyana tal Tel-Aviv, ke (komo todos lo savemos) es muncho mas humanisto i atentivo a no kometer abuzos de poder en direksyon de un vezino mas flako en su infrastruktura militar.’
Anne Hidalgo tyene echo varyos viajes en el Oriente Medyo, syempre atentiva a vijitar los dos payizes aktualmente en estado de konflikto. Eya munchas vezes enkontro ombres politikos de las dos partes, avlo personalmente kon varyos de entre eyos en mirando de ser absolutamente imparsyal en su djuzgamyento i sus opinyones.
Ansi, aun su absoluta reprobasyon de kualkyer ‘okupasyon de tyerras vezinas’ eya de otra parte se rendyo igualmente kuento ke mas de la mitad de la populasyon İsraelyana es muy sensivle i absolutamente kontra semejantes aktos ke rebashan el puevlo hebreo.
Es dunke por esta razon ke afin de evitar (komo fue dicho mas arriva) kualkyer amalgamo entre los dos diferentes grupos İsraelyanos, ke Anne Hidalgo kijo nombrar “Tel-Aviv sur Seine”una de las festividades balneares ke son organizadas kada anyo al bodre del famozo rio ke korta la sivdad de Paris en dos.
Uno de los nombrozos djornalistos fransezes ke eskrivyeron largamente a este sujeto, disho vyernes de manyana lo sigyente: “El evenemento parizyano “Tel-Aviv sur Seine’ dezeava ser una fyesta para honorar Tel-Aviv, ma esto torno en produkto empapado de vinagre, un sinyo de mas de la transpozisyon del konflikto İsraelo-Palestinyano al sentro mizmo de la kapitala Franseza” une fête mettant à l’honneur Tel-Aviv. Il a plutôt tourné au vinaigre, un signe de plus de la transposition du conflit israélo-palestinien au coeur de la capitale française.)
En efekto el mizmo dia, a las mizmas oras ke se fyesto ‘Tel-Aviv sur Seine’ se formo poko a poko, a una distansya relativamente chika de las festividades pro israelyanas protejadas por kaji 500 polisyeros, un djenero de baryera humana echa, eya, de partizanos pro- palestinyanos ke yamaron sus arrekojimyento :”Gaza sur Seine”.
Ansi ke pensan syertos komentadores, este evenemento se transformo en un djenero de polemika politika, ravivando las diskusyones sovre la nesesidad de un boykot ekonomiko jeneral de los produktos İsraelyanos, solo remedyo (segun eyos) para luchar kontra la politika İsraelyana de kolonizasyon.
No uvo horozamente ningun insidente konkreto ma un pasto amargo muy amargo en la boko de los relativamente pokos partizanos pro-İsrael.
Fue lo ke fue el rezultado del evento “Tel-Aviv sur Seine” el manifesta la tenasidad de la simpatia de nombrozos myembros superyores del governo Fransez tal ‘Manuel Valls, Anne Hidalgo i otros’ ke eyos refuzan de nyegar la valor del puevlo de İsrael.
* P.S.: Kada enverano, la munisipalidad de Paris organiza un djenero de plaj artifisyal sovre una de las dos orriyas del rio ‘la Seine’, kon arena en basho, parasoles, tranzates, chikas bibliotekas mobiles i tambyen varyas animasyones muzikales.
