La Alegria de ser “papu”

Silvyo OVADYA Köşe Yazısı
12 Ağustos 2015 Çarşamba

Entre estos dos alhades la mas grande diferensia ke esto biviendo es ke kon el nasimyento de mi inyeta Aria: me ize papu. Todos me estan demandando lo ke esto sintiendo. Mis sentimientos no fueron ajitados. Ma esto muy orozo kon el nasimiento de mi inyeta. Bivi dos nasimientos kon mi ija trenta i uno anyos antes i kon mi ijo katorze anyos antes. Todos no tienen el mazal de ser papu kon un ijo de katorze anyos. Anyos antes kuando no egzistia las seguridades de salud ke oy en dia son indispensavles; era una sorpreza lo ke devias de pagar al ospital. Oy te estan dizyendo lo ke deves de pagar antes de parir. (Mizmo si es un nasimiento kon operasion - sezarien)

Dyez anyos antes no avia el ofisio de fotografo de pariduras. Oy kuando la futura madre kon las dolores de paridura se esta aparejando para ir al ospital, telefona a la fotografa (mos afito una mujer ma kreo ke la mas grande partida deven de ser mujeres porke los maridos no preferan ke un ombre partisipe a la paridura) i la informa kuando va ser la paridura. Eya toma fotografias en la sala de operasion dospues en la kamareta kon el bebe. Mos va traer un album kon todas las fotografias. Los koridores del ospital yena de djente (fue la mizma koza kuando nasyo mi ijo – todas las amigas de mi mujer Lika mizmo siertas kon sus maridos estavan en el ospital i el mediko le paresyo ke es una paridura de las personas ke vienen d’Anatolia (de las otras sivdades de la Turkiya asiatika). Esta djentoria no era para el ospital era solo para el nasimiento de Aria. Sinko o sesh amigas de İlanit, una kon su marido. La madre (siguro ke deve de ser aya), la tiya, la nona, mi mujer, la prima, unas kuantas amigas de su madre, yo el nono del futuro i el tiyo (dayı en turko) Eyal ke fue bulversado kon este haber ke fue una sorpresa para el por ke el nasimiento devia de ser diya de Shabat. El ke estava en la ada en el klub kon sus amigos en dos puntos se fue a kaza se vistio, tomo el katamaran i alkanso al ospital antes ke el bebe venga a la kamareta de los bebes. Fue la madre de muestra vizina Meral i Rozet, la mujer de mi haver ke lo trusheron de la eskala fina el ospital al tiyo Eyal yeno de emosion. Dospues empesaron a vinir otras personas; amigas ke lavoran, primos kon sus mujeres i un alay de djente… Si no tuvitesh kriaturas o inyetos no savesh ke los medikos trokan las leyes del ospital i lo ke se deve azer kon las kriaturas. Antes se trayia las kreaturas solo para alechar (emzirmek). I se kedavan muy poko tiempo en la kamareta kon sus madres. Oy los doktores no son de la mizma idea. Dospues ke la kriatura nasyo unas kuantas oras dospues la dan al lado de su madre i les dizen ke sea kon su madre; si empesa a yorar alechale… Toda la noche la madre kon el muevo nasido… Ke apreto de korason. Ay tiempos ke los uevos no se deven de komer i ay tiempos ande se deve de komer kada diya un uevo. Para kada koza ay una ley. El Mediko de mis ijos, Nesim Deeskenazis ke va ser agora el mediko de mi inyeta Aria, el primer echo ke esta aziendo es de dar una lista a la madre para ke no demande munchas kozas. Una grande partida de las kestyones son arrespondidas.

La madre de mi inyeta, İlanit nasyo en el empesijo de Pesah. Devesh de saver los ke komen lo mas muncho de los tratamientos son los miembros de la famiya. I komo era Pesah no dimos a los musafires shokolas o drajes (esta epoka no avia shokolas i drajes kasher i kasher shel Pesah) i merkimos masapanes. Komo plaziya a toda la famiya masapanes kada demanyana el primera echo ke azia era merkar masapanes de la Patiseria Osman porke se eskapava todo lo ke fue merkado... Esta vez dospues de la paridura merkimos drajes i shokolas para ofreser. I savesh agora se deve dar tratamientos komo sandwiches, gatos, biskochos … Kafes, ekspresos i limonatas… Porke los ke vienen a kudyar o a felisitar no se embiyan sekos. Ma komo la mas grande partida de los musafires komo son mujeres ke azen rejim diez mezes al anyo – mizmo si no azen no komen kuando ay djente – no komen nada i son los miembros de la famiya ke s’entrufan los sandwiches i los kekes.

Todo este ruido i shamata s’eskapo kuando viernes antes del Shabat desharon el ospital para ir a kaza.

Esta senmana vamos a resivir los kosfuegros Italyanos ke van a vinir a ver la inyeta Aria. (Mi inyeta komo es Turka, Italyana i Franseza le toparon un nombre ke es konforme a todas las tres linguas…)

El mas grande plazer para mi va ser kuando va pueder pasear kon mi inyeta unos kuantos mezes dospues o kuando va tener el mazal de ir kon eya al sinema o a un sirko …

Espero para mi de ver la felisidad de mi inyeta kon mi ija i mi yerno…