Aun ke personalmente no pude asistir a este presyozo evento sosyo-kultural (elkual prova la importansa ke toma la lingua de muestros avuelos en el Payis de Descarte) no me puedo detener de komunikar a los lektores de este artikolo el sukseso ke “la tresera Universidad de Enverano de Aki Estamos” obtuvo.
Segun lo ke me konto mi amiga Norma Anav instalada en Fransya desde anyos (eya mizma reprezentante aktiva del “International Council of Jewish Woman” en la UNESKO) la tresera Universidad de Enverano organizada en la Kapital franseza, por “Aki Estamos los amigos de la Lettre Sepharade” en kolavorasyon kon la Aliansa İsraelita Universal, respondyo no solo al profundo dezeo ke sentimos munchas vezes de toparmos kon otros korelijyonaryos, ma tambyen a la nostaljia de un pasado relativamente serkano al kual kedimos sentimentalmente atados.
Ansi, desde Alhad el 5 del mez koryente asta el vyernes de la mizma semana, fue en Paris una fyesta no solo para los ojos i los oyidos ma en mizmo tyempo para el korason de munchos de muestros ermanos ke no konosian la valor de las romansas de muestras nonas ni de los poemas de amor eskritos en muestra lingua ansestral.
Se oyo konferensyas dadas kaji todas en djudeo espanyol por intelektuales de varyos lugares del mundo, tal Marie Christine Varol (Franseza de nasyonalidad, espesyalizada en el Sefaradizmo de Turkia) i tambyen otros por la mas parte venidos de los Estados Unidos, entre los kualos munchos profesores de universidad savyos en el analizis de la lingua ansi ke de la kultura de muestros avuelos… i lo ke fue tambyen muy interesante es ke munchos auditores tomaron tambyen la palavra despues kaji kada konferensya para komunikar a sus torno sus propyas eksperiensas sovre varyos sujetos, lo ke produzyo “un djenero de interkambyo jeneral de ideas i sentimyentos”.
En desparte de esto, uvo diferentes projeksyones sinematografikas, kada una kon su sujeto propyo, ansi ke konsertos durante loskualos kantadores de grande fama izyeron oir la muzika sefardi i munchas vezes dospues las varyas audisyones muzikales, personas de la asistensya se atrivyeron tambyen a azer oir sus propya boz...
De mezmo, en la kozina (mutfak) se oyo interkambyos de resetas kulinares yenas de muevos pastos i golores, lo ke tyene una grande importansa. No ay dubyo ke en el pasado, el Pranso Familyal, partikolarmente el de noche de Shabat kon los platos ke kada balabaya de kaza aparejava kon amor de sus propyas manos, era estonses i es syempre oy, uno de los faktores ke renforsan el atamyento afektivo de los jovenes a la kaza familyal, konsepto ke malorozamente, en munchos lugares ahuera de Israel, riska de pedrer su valor primordyal..
İ, puede ser por la primera vez en semejantes reunyones, uvo “dos atelyes de desen i pintura sovre temas sefardis para ninyos”, dirijidos por dos de muestras korelijyonaryas nasidas en Turkia: “Rita Ender” i “Sandra Albukrek Sebban” lakuala konosko de serka i ke tuve el plazer de enkontrar la semana pasada.
En estos atelyes se trata por seguro de ensenyar el desen i la pintura i de anchear la kapasidad de imajinasyon de los ninyos, ma tambyen de despertar en sus esprito, grasyas a sujetos apropyados, el sentimyento de azer parte de una famiya djudia.
De espanto de eskrivir kualkyer detalyo inadekuado, prefero ke Sandra Albukrek Sebban eya mizma vos eksplike personalmente la koza a la okazyon de una futura entrevista ke le demandi de akordarme a este sujeto.
İ para kloturar ester chiko artikolo, una vez mas me permeto de repetar ke esta tresera Universidad de Enverano fue (segun todos los ke asistyeron) la real afirmasyon de un Sefaradizmo ainda bivo no solo en el espasyo kultural ma igualmente al nivel de la vida djudia de kada dia, ansi ke de muestra fidelidad a los uzos i kostumbres heredados de muestros avuelos, los kualos durante un largo periodo fueron en estado de kontinual peregrinaje, rondjados de un lugar al otro.
No desharemos dezapareser esta ermoza solidaridad ke jeneralmente detyene los djudyos atados los unos a los otros.
