Vyernes pasado el 12/6/2015 fue el ultimo akto de una trajedia o (por ser mas serka de la verdad) de una inyovle komedia fraguada puede ser sovre una chika partikula de verdad ma terrivlemente empapada de odyo.
Todos savemos ke munchas vezes las mas grandes mentiras son los simples ma dramatikos rezultados de chikas parselas de realidad desformadas i sovre todo, lo ke es lo mas perikolozo, enrikesidas konsyentemente o inkonsyentemente por kada uno ke las repeta.
Esto dicho, mos demandamos ainda oy, kualo fue en el anyo 2011 el motivo real de la manera de komportarse del tribunal de New-York ke paresia kerer destruir enteramente la karyera briyante del Prezidente del “Fundo Monetaryo İnternasyonal” en tratandolo komo un inyovle kulpavle, sovre baza de la simple kesha de una lavorante del hotel Sofitel, sin niguna prova ni ningun testigo.
En el primer artikolo a este sujeto publikado kuatro dias mas tadre en esta mizma pajina de muestro hebdomadaryo, lo sigyente fue eskrito: “Por seguro ke todos deven pagar el presyo de sus kulpas, ma ninguno deve ser humilyado. İnnosente o kulpavle, el prezidente del F.M.I. es uno de entre eyos, un ombre kon su dinyidad, un ombre ke ‘si o no’se pudo yerrar...en todo kavzo, asta este momento nada fue ainda provado, ni ningun indisyo tanjible fue prezentado.”
Munchos de los lektores se akodraran por seguro las palavras ke DSK el mizmo avia pronunsyado poko antes este trajiko akontesimyento, kuando el se aparejava a prezentar ofisyalmente su kandidatura a la Prezidensya de la Republika Franseza: “Tres kozas pueden impedir mi nominasyon: ‘la rikeza de mi espoza’, ‘mis relasyones intimas kon varyas mujeres” i tambyen ‘mi djudaidad’”.
Desde el prisipyo de este drama, en los Estados Unidos komo en Fransya, se sintyo en la atmosfera komo un asigo ineksplikavle de kerer destruir el prestijyo del ke se topava kargado de una de las mas grandes funksyones mundyales; el fue tratado tal una kriansa inyovle, manos atadas detras la espalda komo un kriminal peligrozo, sovre baza (lo repeto) de la sola deklarasyon de una mujer kaji analfabeta ke no tenia ninguna prova en mano.
Si, desde el empesijo uvo aktos obskuros en este kavzo, lo ke izo pensar a un djenero de komploto ke nada konfirmo mas tadre, ni ke igualmente nada desmentyo.
Lo mas estranyo durante estos tres o kuatro ultimos anyos, fue tambyen la hostilidad intensa de algunos de sus kompatriotos fransezes i sus apresuramyento a avrir kontra el ex-prezidente del FMİ, varyos otros prochesos ke nunka ayegaron a un kualkyer rezultado pozitivo en favor de los keshadores.
Mizmo en el ultimo procheso de la semana pasada al sujeto de reunyones galantes en hoteles partikolares, varyas Autoridades de la Djustisya se toparon en kontradiksyon entre eyas.
Kuando los Djuzgos de İnstruksyon konsideraron el simple fakto de partisipar a nochadas espesyales komo motivo sufizyente de kondanasyon, la Djustisya Lejislativa, eya, konsidero este fakto komo una simple kulpa moral i no komo un akto kondenavle .En esta epoka ke es la muestrea, ande la ‘homoseksualidad’ es anchamente akseptada en munchos payizes evropeos, un ombre puede ser muy libertino, sin por esto mereser de ser tratado komo un prokseneto.
Oy, unos kuantos dias despues ke el verdikto final de la Alta Korte Juridika fue pronunsyado, la relaksa definitiva de Dominique Straus-Kahn parese ser komo “la viktorya de la verdadera Ekuidad, kontra la presipitasyon de djuzgamyentos munchas vezes provokada por motivos futiles”.
