Yom Yerushalaim

Dora NİYEGO Judeo-Espanyol
20 Mayıs 2015 Çarşamba

Yom Yerushalaim, Diya de Yerushalaim, kaye en la data el 28 de İyar. Este diya es la komemorasion del momento historiko el mas noblo del amor entre los judyos i Yerushalaim. Es la fiesta de la liberasion de la sivdad vieja i la reunifikasion kon la mueva, duspues de la gerra de sesh diyas, en el 28 İyar 5727.

El amor de los judyos por Yerushalaim komo la kapital del judaizmo, empesa en la Tora. El nombre de esta sivdad santa se repetada sienes de vezes en el Tanah. El Talmud repeta munchas vezes muestro atashamiento (bağ) a esta sivdad. Es las manos del ombre ke konstruizo los templos santos de Yerushalaim. El rey David, saviendo ke Yerushalaim es una sivdad santa, merko esta tierra de los moraderos para konstruir el Templo Santo.

Es en esta sivdad ke Avraham ofrio su ijo İzhak komo un sakrifisio, i es en este lugar ke Yaakov se sonyo de los anjelos suviendo la eskalera.

Por los judyos, este lugar del Templo es la puerta del ganeden en este mundo. El korason del judyo se esperta kuando el judyo se aserka al pedaso dalkavo ke kedo del Templo Santo. Ke estorias pueden kontar las tierras de la Pared de Lamantasiones! La dolor i la sufransa de la istorya judiya estan guadradas en estas piedras grandes. Miliones de lagrimas i miliones de orasyones estan prononsadas en este lugar santo.

Las piedras de debasho de la pared estan briyando porke estan tokadas por miliones de judyos komo si eyos keren tokar el korason i la kara del Dio.

Por el Diya de Yerushalaim, los israelianos aparejan munchos eventos en munchas komunidades judiyas: resitasiones de orasiones, kantes i bayles, komidas espesiales, konferensias sovre la istoria i el futuro de Yerushalaim, una resepsion publika por el alkade (belediya reisi) de Yerushalaim, seremonias por los ke murieron en la Gerra de Sesh Diyas, eskursiones a Yerushalaim. Este diya es un diya de fiesta en İsrael.

El kuarenten aniversario de la reunifikasion de Yerushalaim fue en el anyo 2007. El tema de las selebrasiones de akel anyo fue ‘Una koza espesial por el mundo entero’. Se aparejo un djugo kon las palavras ‘espesial’ i ‘unido’. Un logo espesial reprezantando el numero 40 fue enkolgado en la pared de lamantasiones, i el kamino de Tel Aviv a Yerushalaim fue dekorado kon luzes.