Varyasyones en las Bodas de Neve Shalom

Silvyo OVADYA Köşe Yazısı
20 Mayıs 2015 Çarşamba

E l anyo pasado djusto estas datas el ijo Igal de muestros amigos Sheila i Jojo Nassi ke era el prezidente de la Fondasyon del kal de Neve Shalom kon la ija Esen de Belkis kazada kon un mediko de kriaturas famozo en muestra sivdad i ke bive oy en dia en Canada, Jak Özsarfati se kazaron en Estanbol en el la Sinagoga de Neve Shalom.

Esta seremonia fue una sorpreza para las famiyas i para los partisipantes. Los dirijentes de la sinagoga organizaron un konserto kon Izzet Bana i su grupo formado par los ijikos entre diez i tredje anyos ke se yama “Estreyikas d’Estambol”, kon la partisipasion del kantador Cenk Rofe ke es kapache de kantar en Judeo-Espanyol i en Ebreo. Mizmo a la fin de la seremonia kuando kada una i uno estan felisitando los muevos kazados kon sus famiyas “ Las Estreyikas” estan kontinuando a kantar. Ya savesh ke el grande mal en la Sinagoga de Neve Shalom es de ayegar a la teva en maltratando las personas ke vos estan detenyendo para alkansar al buto. Devo de achetar mizmo kuando era prezidente de la Komunidad no topi un remedio mizmo unas kuantas ideas ke se puedian realizar para eskapar este balagan. Defendiyeron de ir por aki, dospues por aya; dingun rezultado; en todas las formas los musafires estan en kontakto; l’uno aryentro del otro…

Dia de alhad estavamos envitados a una boda de una vanda parientes (la ija de la prima de mi mujer) de la otra vanda amigos. Fue una seremonia reelmente reushida. Los mansevos de las famiyas Yakuppur i Yahya se kazaron la mano en la mano debasho de la hupa. “Las Estreyikas” kon Cenk Rofe reelmente alegraron la sinagoga kon sus kantes. Los novios, sus famiyas i los musafires estavan kon kara riyente. La muzika era la razon de esta alegria. Dospues me ambezi ke estos konsertos eran prezentados para las seremonias ke turan mas de doz oras.

Las bodas djudias se realizan en unas kuantas seremonias en Estanbol. En primero es el kazamyento sivil ke se realiza kon un responsavle ke viene de la munisipalidad i ke se realiza una o doz semanas antes de la boda si no ay siertos problemes. Si tienes konosimientos o si sos amigo kon el prezidente mizmo el o eya vienen a la seremonia. Se aze en los salones de la Munisipalidad o mizmo en un lokal ande se da pranso dospues de la seremonia. En segundo es el kazamyento relijozo en la sinagoga i el treser es la seremonia kon pranso ke se realiza a la noche de la seremonia relijioza ke deve de ser kasher (agora tenemos mizmo shampanya kasher ke viene de la Fransia). El anyo pasado demandaron de realizar estas dos seremonias en un lokal kon la hupa en medio i este modo reusheron las dos seremonias kon un fostan i mizmo kon el smokin sin el vistido blu marin o grizo. Fue muy rezonavle.

Los djudios komo les plaze tomar inisyativa demandaron esta vez de azer el kazamyento sivil en la sinagoga antes del kazamyento relijiozo. Reelmente komo era lojiko lo achetaron i kreo ke en unos kuantos mezes va empesar esta mueva moda. De muevo un fostan de ekomia; mizmo i un vistido.

Es shakas, no esto seriozo. Kero felisitar los dirijentes de muestra komunidad ke estan avyertos a todo modo de ideas. Estan dando todas las posibilidades a muestros korelijionarios. Reelmente kon el nombre de bodas ke se esta realizando (serka de sinkuenta deyos kada anyo - djudyo kon djudyo) los dirijentes no tienen derecho de azer difikultades. Ke todos los mansevos sean orozos i ke se kazen relijiozamente komo lo keren.