Şemini

Rav Yeuda ADONİ Köşe Yazısı
16 Nisan 2015 Perşembe

Kuando se termino el lavoro de el tabernaklo, vyendo Moshe Rabenu ke todo esta custo sigun el komando del Todo Poderoso, amostro su kontentes i los bendizo sovre el komando del Kriyador. Ordeno Moshe el mishkan el primer diya del mez Nisan de este anyo, i metyo kada koza en su orden. Las tavlas de la ley ke estavan en su tyenda, los metyo dyentro el Aron Akodesh, ke izyeron de un palo de pino muy alavada nombrado ‘shita’ i kuvyerto de oro por adyentro i por afuera. I lo kuvryo el Aron Akodesh kon el kaporet. Despues de azer todo lo ke enkomendo el sinyor de el mundo, se kuvryo el mishkan de una nuve. Esto fue un sinyal por el avenir. Ke dizde akel diya todo tyempo ke estava la nuve sovre el mishkan, no se meneava el puevlo de onde estavan pozados. Kuando se alevantava la nuve, se levantavan el puevlo i se ivan kaminando asta ke pozava otra vez, la nuve sovre el mishkan i pozavan eyos.

Despues de esta, al ochen diya lo yamo i lo nomino Moshe a Aaron servitor grande del Kriyador(Koen Gadol) delantre los savyos i el puevlo Djudyo. Despues de azer Aaron Akoen la seremoniya de los sakrifisyos sigun le enkomendo Moshe, vyeron todo el puevlo la onra del Todo Potente ke pozo sovre el mishkan delantre de todo el puevlo Abasho fuego de los syelos sovre la Ara-Mizbeah. Ke kemo todos los sakrifisyos, todo el puevlo no tuvyeron el koraje de sostenersen en pyes i se abokaron sovre sus fases i alavaron al Kriyador por esta ovra maraviyoza ke amostro kon eyos.

En medya de esta santa- alegriya, le afita a Aaron un dezastre manziozo. Sus dos ijos Nadav i Aviu kijeron pasar sus limito i azer un sirvimyento al Kriyador sin ser otorizados. El Kriyador no estuvo kontente de esto, i muryeron ai delantre. Aaron mostro akea ora su noble korason, i tomo el echo kon muncha pasensya. Sin pensar ni atristarse por nada syendo esto fue la voluntad del Kriyador.

La seremoniya de estre nomyente se termino kon los donos i sakrifisyos ke izyeron los doce prezidentes de kada triva.

En pensando de este diya, ayegaron un kobran i trusheron mizmo dono un prezidente kada diya.