Vayikra

Rav Yeuda ADONİ Köşe Yazısı
18 Mart 2015 Çarşamba

I yamo El Kriyador a Moshe, i le avlo de la tyenda del plazo (Mishkan, santuvaryo) dizyendo:

“Avla a los ijos de Israel i diles kuando un ombre de entre vozotros ayegara alsasyon de la kuatropea a El Kriyador.”

En el Talmud nos endika: El ombre ke trae un prezente a Yerushalayim i ve el servisyo ke se rije en el santuvaryo, le vyene un sintimyento de Yirat Shamayim, temor de dyos. El tyempo ke egzistiya el santuvaryo, Yerushalayim era una sivdad yena de temorde Dyos. Por esto es dicho:

“Ki mitsiyon tetse Tora Udvar Ashem Mirushalayim”.

De tsiyon sale la Tora, i la palavra de Dyos de Yerushalayim.

El santuvaryo poza temor de Dyos sovre el ombre. Meldamos en el Talmud: Dize Raban Shimon ben Gamliel. No egzistyo diyas alegres en el puevlo de Israael komo diyas de Kipur i Tu Beav. Ke en estos diyas las ijas de Israel se vistiyan vistimyentas blankas, por no averguensar a las ke son menesterozas. I se enprestavan unas de las otras.

La alegriya de Yom aKipurim era por kavza ke es diya de perdonansa.

Tu Beav 15 de mez de Av, era el diya ultimo de traer lenya a el santuvaryo por las korbanot. Los ke eran apropyados a esta misyon se gustavan ke topavan tyempo para el estudyo de Tora.

Sigun meldamos en la perasha; el ombre ke morava leshos de Yerushalayim, por ayegar el korban se iva a Yerushalayim. En el santuvaryo su korason se inchiya de alegriya.

Un midrash nos konta:

“Un pekador ke manera se pueda perdonar?

 La sensya responde dizyendo, el mal presige a el pekador.

La vizyon(nevua) la profea responde dizyendo la muerte lo perdona.

La Tora responde dizyendo ke trayga un sakrifisyo(korban) i ke se perdone.

El Kriyador responde dizyendo ke aga teshuva i ke se perdone.”

Daki entendemos la Teshuva, el arepintimyento es mas grande de un sakrifisyo.

Agora ke no egziste santuvaryo, i tambien sakrifisyos, la orasyon ke azemos kon entisyon buena, suve a los syelos i nos eskapa de todo modo de mal, komo es dicho “Unshalema Parim Sefateenu”.

Nuestros lavyos ramplasan los sakrifisyos.