Tetsave

Rav Yeuda ADONİ Köşe Yazısı
25 Şubat 2015 Çarşamba

Ansi enpesa la perasha: “I tu enkomendaras a los ijos de İsrael ke te tomen azeyte de oliva, klara, majada, para arelumbrar el kandil de kontino.”

La almanera(Menora) ke se topava en el santuvaryo sembolizava La Tora. Shelomo Ameleh en el livro de Mishle, asemeja la kandela a las enkomendansas, i a La Tora a la luz. I la sensya es una luz. Komo la eksplika el savyo Shelomo Amaleh en el livro Koelet; la sensya de el ombre arelumbra sus fases. La persona ke estudya i kompra la sensya, sus ojos briyan. La sensya de La Tora, es klara, arelumbra los ojos. La Menora (la almenara) ke se topava en el santuvaryo, dava santedad, i fineza a el puevlo Djudyo. I tambien un mantenimyento sin rejisto ni verguensa.

No es fasil de alkansar i komprar la ley i el mantenimyento. Deve de azer la persona muncho esforso a alkansar estas vertudes.

Si la persona dize: “Lazdri muncho i no pude alkansar,” no te kreyas i tambien;” no lazdri i alkansi” no te kreyas. Para alkansar a el estudyo de La Tora, i el mantenimyento deve de azer el ombre muncho esforso. Komo lo meldamos en Pirke Avot; “aparejate a ti mismo a el estudyo de La Tora.” Por ke no es una erensya. La Tora demanda de nozotros, lazerya i esforsos. Por el mantenimyento de la persona dize La Tora kon la sudor de tu frente komeras el pan. En el livro de Iyov meldamos la persona nasyo por penar. Por el estudyo de La Tora deve el ombre penar kon todo su korason i kon toda su alma. Por su mantenimyente deve penar sigun su menester.

Komo meldamos en el livro de Teilim; “kuando komeras kon lazerya de tus manos, bien aventurado tu i bien ati.”

En la vida ay menester de la ley i el lavoro.

Komo meldamos en los Perakim; “La ley i el lavoro tira a la persona de el pekado. En la perasha de Behukotay meldamos si en mis fueros anderes. Rashi eksplika este verseto dizyendo: “Ke estudyes mi ley. En La Tora meldamos seş dias azeres tu lavoro, i kompleteras todo tu echo. Por alkansar a el diya de Shabat i entremeterte kon santedad a el estudyo de La Tora.

En el Talmud dize: “No asemeja meldar un teksto 100 vezes a 101 a vez ya egsiste lazerya sin kanserya, si la persona pena para alkansar a un buto i el buto ke kere alkansar es un buto sakro, no konsiyente la persona una kanserya.

Los ke esperan a El Kriyador se inchen de fuersa, korren i no se kansan, ondan i no se kansan.

La luz de la ley syempre ke nos arelumbre.