Djueves pasado, el 12 del mez koryente, una manifestasyon de aproksimativamente 300 personas fue organizada en Paris por grandes institusyones djudias en memorya de la muerte atros de İlan Halimi, inflijada antes 9 anyos por la sola razon ke el era djudyo.
Komo por seguro munchos de muestros lektores se akodraran, este horrivle akto kriminal avia sido perpetrado sin ningun motivo, por la banda salvaje nombrada “la bande des barbares”. Se puede mizmo pensar ke İlan Halimi avia sido eskojido fortuitamente, por hazardo, komo viktima de un odyo feros kontra los desendyentes de Moshe muestro grande profeta.
Antes de ser krualmente matado, el avia sido detenido inkarselado sin piadad (provablemente manos i pyezes atados i boka serrada) en el maksen de un apartamente okupado por migrantes venidos de varyos payizes afrikanos o asiatikos.
Este kavzo se topa al orijen de nombrozos otros atakes semejantes en direksyon de la kolektividad djudia de Evropa, komo por egzrmpyo: el drama de la eskola primarya de Toulouse, los asaltos mortales en el muzeo djudyo de Bruksel, la agresyon de dos djudyos ‘marido i mujer’ en Creteil, i ay de esto unas kuantas semanas, la matansina de 4 djudyos en la botika de komanya Glad Kasher de Vincennes, el dia mizmo ande fue perpetrado el atake kriminal kontra Charly Hebdo.
Shabat pasado el 14 febrero, dia dedikado al amor, fue los dos atroses atakes en Danemarka ke desharon komo rezultado dos muertos i munchos feridos, el uno kontra un sentro kultural ande avia ‘una konferensya sovre la libertad de pensamyento i de ekspresyon,’ a la kuala partisipava Lars Vilks autor de las primeras karikaturas difamantes ke arrebashavan el prestijyo del mas grande profeta del İslam; el otro (unas kuantas oras mas tadre) kontra una Sinagoga Djudia, ke kosto la vida a un mansevo (se entyende byen djudyo) ke avia benevolamente asumido la guardya del Lugar Santo.
Partikularmente en este ultimo kavzo, komo eksplikar esta obstinasyon kriminal del matador de golpear a muerte un inosente ke tenia komo solo pekado de ser djudyo?
Alhad el 15 febrero, en sinyo de homenaje a las viktimas de los atentados en Kopenhag, aproksimativamente 300 personas se rekojeron para honorar sus memorya, delantre la Ambasada de Danemarka en Paris, respondyendo ansi a la yamada del “CRİF”, komo tambyen de la “Unyon de los estudyantes djudyos de Fransya (UEJF)” i de “SOS Racisme”.
El mizmo dia de Alhad, el Gran Rabbino de Fransya ‘HAİM KORSİA’ deklaro ser eskandalizado por las agresyones de Kopenhag i reklamo aktos fuertes para luchar kontra el terrorizmo i kontra todos los ke utilizan komo instrumento ‘la relijyon i el nombre de Dyo’ para matar.
El reklamo aktos konkretos de represyon kontra los kulpantes i un sistema de edukasyon ke puedra eradikar por syempre este inyovle sentimyento de aboresimyento ke sin kedar amenaza el djudaizmo
Estas varyas manifestasyones kontra los asaltos de barbaria deven ser repetadas sin falta, regolarmente, komo aktos de ‘Djusta revolta’ kontra la ignominia de ‘kualkyer tentativa de anihilamyento’ perpetrada de parte de ken ke sea i sovre ken ke sea.
Oy, para munchas personas, ‘la multitud de muertes anunsyadas en la prensa’ devino malorozamente komo un simple shifro ke por seguro aze mal, ma ke keda syempre un shifro. Oy, en el korason de algunos de muestros semblavles, es el dubyo i el sospecho ke realmente se despertan i no syempre una verdadera solidaridad kon las viktimas. Poko a poko se syente komo un djenero de amenguamyento del sentimyento dolorozo ke esto mos prokurava antes dyes o vente anyos.
Eske el humano empeso imperseptivlemente a pedrer parsyalmente su humanizmo? Es ke es el empesijo (por seguro ainda hezitante) de un djenero si no de ‘indiferensya en direksyon del otro’, ma de ‘enfortesimyento en mozotros de muestro egosentrizmo’?
“Deshar sin kastigo un akto fanatiko destruktor kontra kualkyer grupo humano” (ke las viktimas sean djudias o de otra relijyon) es syempre un sakrilejyo i syempre apareja muevas desgrasyas...
Enorme manifestasyon en Kopenhag mizmo
Dos dias despues los golpes asasinos kontra un sentro kultural i una sinagoga de Kopenhag, ke desharon detras de eyos dos muertos i nombrozos feridos, una granda manifestasyon kompuesta de 30.000 (trenta mil) personas, fue organizada en la mizma sivdad, a la memorya de las viktimas muertas i en un esprito de solidaridad kon los ke sufrieron en sus puerpo komo tambyen en sus sensivilidad.
En el diskorso ke el shefe del governo Helle Thorning-Schmidt pronunsyo delantre la multitud de los partisipantes, el disho estas palavras: “Kero dizir esta noche a todos los djudyos de Danemarka “No sosh solos, un golpe kriminal kontra los djudyos es un golpe kontra el payis entero”
