Aun ke graves kestyones ekonomikas komo tambyen politikas se abaten kada dia mas sovre los tres kuartos del mundo, la mayor parte de la prensa oksidental persiste a atadrarse sovre los varyos aktos de violensa perpetrados kontinualmente por diferentes nebulozas terroristas tal: Al-Kaida, Boko-Haram, İşid/Eiil ets... ets... lo ke mos da una idea del grado de anksyedad ande se topa la humanidad ferida en su dinyidad i su esforso de sivilizasyon.
Kuatro semanas despues los tres golpes kriminales perpetrados en Paris de parte de djihadistos nasidos i edukados en el payis ke fue para la humanidad ‘un verdadero manadero de sivilizasyon’, el mundo oksidental esta ainda debasho el shoke emosyonal ... I partikolarmente (lo ke se entyende byen) la Fransya ke se syente syempre amenazada por semblavles aktos kriminales i se topa en la insertidumbre de un futuro dubyozo ke la traumatiza profundamente.
En este momento, aun sus otros grandes problemas de importansa vital, eya parese ser enfohada en la bushkida de un remedyo ke rendra posivle la eradikasyon del peligro de tener sovre sus tyerras ‘fuersas otoktonas enemigas’ ke dezean estableser en el payis un estado negativo.
Komo ya fue eskrito la semana pasada en esta mizma pajina, mezuras drakonyanas son proyektadas i gradualmente aplikadas, partikularmente en el kampo edukasyonal i estudyantino afin de luchar kontra la posibilidad de kreasyon de una kualkyer nebuloza djihadista lokal, ‘movimyento esensyalmente negativo’ en el kual munchos grandes psikologos i pedagogos ven un djenero de nihilizmo ke tyene komo prinsipal objetivo “el anihilamyento absoluto del sistema demokratiko” el kual aktualmente dirije una parte del mundo, un nihilizmo salvaje ke obskuresera por syempre la vizyon de la humanidad, tal una diktatura infleksivle en su refuzo imperyozo de entender el ‘otro ke si mizmo’.
A primera vista, el termino “nihilizmo” parese inadekuado por aktos perpetrados al nombre del Koran i de su kodigo ethiko, kuando por kontra el diksyonaryo Larousse mos ambeza kategorikamente ke antes de todo “el Nihilizmo es la negasyon de todo modo de kreensa”, i ke Dostoievski mos dize ke “el nihilizmo no solo nyega la egzistensya de Dyo ma tambyen la sinyifikasyon de la kreasyon i la razon de ser del mundo i de la vida”.
En una entrevista ke el filozofo fransez ‘François Guery’ akordo a la revista “Le Point”, el deklaro lo sigyente: “La palavra “nihilizmo” es difuza i no muy klara, eya tyene una doble sinyifikasyon; de una parte eya indika‘un movimyento politiko i partikularmente un grupo terroristo de revoltados rusos ke en 1881 izo eksplozar la karosa de Alexandre II, ma de otra parte, Nietche utiliza este mizmo termino para kualifikar un djenero de deskadensya moral i intelektual.”
Munchos grandes pensadores tal: Emil Zola, Albert Camus, Eugene ionesco ets... estudyaron tambyen el problema tan difisil a rezolver de la ambivalensya ke egziste en la palavra “nihilizmo” sin portanto pueder enteramente parvenir a azerlo.
De mezmo, syempre kedara en el esprito humano esta mizma kestyon ke nunka resivra una verdadera repuesta “Kualo sinyifika egzaktament la egzistensya del ombre sovre tyerra?”.
