El dia del Ladino se va selebrar el 8 de Febrero 2015

Silvyo OVADYA Köşe Yazısı
14 Ocak 2015 Çarşamba

Ayer estavamos prontos a resivir mas de 220 personas kuando vyernes un hipermarket kasher en Paris fue atakado i sinko personas fueron matados por un teroristo. Ke mal de semana pasimos kon los evenimientos ke se realizaron en Paris. Era reelmente un dezastre el atako a la revista de karikaturas i de umor Charlie Hebdo. Dodje personas toparon la muerte. Entre eyos se topavan unos de los mas famozos karikaturistos de la Fransia, mizmo del mundo. I por esta razon un milyon i medio de personas de todas las sivdades de Fransia mizmo de todos los paizes del mundo kaminaron de la Plasa de la Republika ande la Plasa de la nasyon por la libertad de ekspresion.

El 8 de Febrero sin tomar dingun risko estamos organizando un program kon muzika i el otro sin muzika. Reelmente devemos de rengrasyar los dirijentes de la fondasyon Neve Şalom ke mos estan dando sus salas para este evenimiyento. Por la anulasyon de ayer malorozamente no pudimos dar haber solo a doz personas ke vinieron de Antalya.

 

El Sinyor Torel fyesto sus syen anyos

Los mansevos puedeser no konosen el Sinyor Rafael Torel. Puedeser no sintieron mizmo su nombre. Anyos enteros la kompanyia komersyal Derby era muy famoza en muestro paiz. Los sinyores Torel i Benoziyo eran los patrones de esta fabrika. No tuvi el mazal de konoser al sinyor Benoziyo ma ay a lo manko vente anyos ke vijito al sinyor Torel. Esta memoria a esta aedad. Reelmente no es de kreer. Vyernes kuando me invitaron a su kaza kon unos kuantos dirijentes i todos los eksprezidentes de muestra komunidad me fui kon grande plazer. Porke reelmente kada vez ke oygo el Sinyor Torel me esto ambezando kozas muevas.

Uno de los puntos mas enteresantes ke konta es dospues del fuego de Dağhamam (kazal entre Kuzguncuk i Üsküdar) i la muerte de su padre lo ke sufrio kon su madre. I no se l’olvido. Oy en dia Rafael Torel es uno de los mas emportantes personajes ke ayuda las ovras kon sus donasyones. Es el ke dio koraje al Ospital Or-Ahayim para fraguar de muevo el pavyon Kaduri.

Este ombre de echo(s) fue kapache de fondar muevos echos dospues de los ochenta. El sinyor Rafael dainda aze todos sus esforsos para ir a la fabrika ke vendio.

Malgrado ke del punto materiel tiene una situasyon muy alta es kapache de entender la situasyon de las personas ke tienen problemes materyales. Enturko ay un proverbo ke dize “Tok açın halinden anlamaz” ke sinyifika el arto no entiende el estado del ambierto. Ma puedo dizir para eskapar ke el sinyor Rafael es un egzemplo kontraryo a este proverbo en turko.