Desde Myerkoles pasado syeten dia del primer mez del anyo 2015, el mundo sivilizado kaji en su totalidad, kristyano, muzulmano, djudyo, o atheisto se topa undido en una terrivle kestyon “es ke es la fin de la sivilizasyon?
Es ke en unos kuantos anyos, mos vamos a topar en un espasyo ande se amatara la dulse klaredad de lo ke fue el siglo de las luzes?
Es ke el rezultado espektakular del progreso syentifiko i tekniko kayera en manos salvajes las kualas azeran de el: ‘un vektor de barbaria’ i no ‘un faktor de adelantamyento i de vida?’
Desde myerkoles pasado, no solo la prensa franseza ma tambyen una partida de la prensa mundyal estan yenas de un djenero de dubyo pesimisto de lo ke puedra advenir despues de los aktos asasinos ke en primero metyeron fin a la vida de 12 personas entre las kualas l0 de los mas grandes karikaturistos satirikos del semanal “Charlie hebdo”, i konsekutivamente, uno i dos dias mas tadre, Djueves el 8/1 la muerte de una polisyera Franseza Muzulmana de orijen, ke fue golpeada en el egzersizyo de su dover de vijilansya i Vyernes el 9/1: 4 djudyos fideles a sus tradisyones ansestrales, matados en un supermarket de komanya Glad-Kosher.
Komo por seguro vo lo akodrarash, ay de esto unos kuantos anyos, uvo tambyen olas irrepresivles de furor de parte de varyos sentros muzulmanos despues el triste epizodyo de la publikasyon en Danemarka de karikaturas ridikularizando el profeta Mohamed, karikaturas ke a su torno la direksyon del semanal “Charly Hebdo” avia poko despues imprimado en su edisyon hebdomadarya.
Savemos todos ke uno de los prinsipales prinsipyos de la demokrasia es la libertad absoluta de pensamyento komo tambyen de ekspresyon.
A este sujeto, el selebre filozofo fransez ‘Edgar Morin’ (Edgar Nahoum) dize aproksimativamente lo sigyente: “Ay un problema ke espunto konsernando la publikasyon de las karikaturas de Mohamed:’ Eske se puede admeter la libertad absoluta de ekspresyon kuando se trata de ofensar la fey de personas relijyozas en sus respekto por el profeta?”
Edgar Morin adjunta tambyen: “En esta kestyon ay una kontradiksyon kaji imposivle a rezolver, partikularmente para mi ke so refraktaryo a kualkyer profanasyon de los lugares i objektos santos. Byen entendido esto no amengua mi horor i mi repunyansa delantre el asalto asasino de Charly-Hebdo”. (fin de transmisyon)
En efekto, la libertad de konsyensya i de ekspresyon es uno de los artikolos los mas importantes del sistema demokratiko i un simbolo de igualidad entre todos los individuos delantre la ley sivil, ma a la kondisyon de no danyar ni arrebashar inutilmente kualkyer persona en su manera de pensar o en su ideolojia.
Es ke las ovras satirikas observan syempre este ovligo de no ofensar la dinyidad de los otros? Devemos akseptar ke en todo modo de libertad, egziste un punto krusyal ande las palavras pueden devinir a sus torno golpes de asalto. Oy el vyejo epizodyo de estas karikaturas sirvyo de preteksto a los djihadistos asedados de sangre ke afirman sus konsepsyones kon un nihilizmo kriminal...
En todo kavzo, kual ke sea el kavzo, nada puede djustifikar el akto asasino de meter fin a vidas humanas.
Avia muy provablemente una koneksyon entre los tres horrivles aktos ke (en total) kostaron la vida a 17 personas i a este propozito una kestyon vyene al tino: Ke kulpavan los kuatro djudyos ke se topavan en la botika de komanya Glad Kasher de la puerta de Vincennes? Ke kulpava la polisyera ke estava kumpliendo su dover de kontrol?
El prezidente François Hollande i el Primer Ministro Emanuel Valls no mankaron de ir prezentar sus kondolenses a los serkanos de la defunda polisyera ni de asistir a la grandioza seremonia organizada en la Grande Sinagoga de Paris para onorar la memorya de las kuatro viktimas djudias.
Alhad pasado komo kaji todos lo vimos en varyos programas tele-vizados, uvo en munchas sivades de Fransya grandes manifestasyones kompuestas en totalidad de kaji kuatro milyones de personas, manifestasyones a las kualas partisiparon altas personalidades politikas de munchos payizes estranjeros.
Alhad pasado fue un dia inolvidable de solidaridad, kohezyon, entuzyasmo i por seguro de inmensa tristeza.
Muestra kolega Dora Niyego vos da en esta mizma pajina un raporto detalyado de la dicha manifestasyon.
