En una epoka ande el Oriente serkano komo leshano se topan debasho olas obskuras de krueldad, ande elevos i elevas son arrankados de sus bankos de eskola para ser vendidos komo esklavos al ke ofrese el presyo el mas alto i ande vyejas naves yenas de migrantes klandestinos ke fuyen la mizerya de sus payiz son abandonadas kada una por sus kapitan i ekipa, entregadas ansi a la muerte ... en esta epoka maldicha ande miles i miles de humanos mueren arrankados a la vida de una manera salvaje, mas de 7000 djudyos partyeron (durante el anyo pasado) de Fransya en direksyon de Israel, shifro ke es mas del dopyo del ke fue el anyo presedente durante el kual 3.293 djudyos fransezes avian deshado sus payis de nasimyento para ir bivir en el de sus antiguos avuelos.
Segun la organizasyon djudia ke se okupa de la imigrasyon en İsrael, es por la primera vez ke los djudyos de Fransya fueron mas numerozos ke los ke partyeron de los Estados Unidos (3.870 en 2014), ansi ke de la Rusia (4.830)
Kuala es la verdadera razon de este redoblamyento del shifro de partensya de los djudyos del payis de Montaigne i Pascal, en direksyon de Israel, entre los kualos la mitad es kompuesta de mansevos aedados de manko de 35 anyos?
Komo eksplikar esta pujita espektakular de olim fransezes durante los dos ultimos anyos?
Es ke se puede pensar ke a la baza de la desizyon de partensya de munchos de entre eyos, se topan unikamente las manifestasyones de antisemitizmo ke devinyeron de mas a mas frekuentes i los asaltos terroristos ke (aun la vijilansya de las Autoridades Governomentales) kostaron la vida a munchos jovenes i ninyos djudyos?
Por seguro ke el odyo ataviko de una fraksyon de la populasyon ultra nasyonalista franseza i los aktos kriminales de nombrozos muevos migrantes konstituen un faktor major de este egzodo, ma es ke el es realmente el solo motivo?
Ke los imigrante djudyos sean fervyentes kreentes o atheistos, (ahuera los espasyos palestinyanos okupados por las kolonias de los haredim) İsrael es para kada uno de entre eyos, el solo refujyo ande el se puede sentir realmente en seguridad i esto es muy importante para una manseves ke se topa simultaneamente delantre el dezeo de ser performante i tambyen el presentimyento ke es solo aya, en este chiko espasyo del Oriente Medyo, ke su futuro se puedra verdaderamente realizar.
Ay a la baza mizma de la relijyon djudia, en sus primeros preseptos, “el thema prinsipal de la importansa de la vida de sus propyos myembros komo tambyen de los de las otras kreensas”.
El grande komentador de la Biblia “Epstein” mos ambeza ke mizmo si el monotheizmo djudyo no fue el primer a manifestarse, el es el solo a tener un kontenido ethiko sovre el kual fueron fraguados los prinsipyos de su kodigo vital.
El dize tekstualmente: “Kontraryamente a las otras divinidades, el Dyo de Abraham era esensyalmente un Dyo moral para ken la derechedar i la praktika de la djustisya eran primordyales”.
