Estranya epoka ke es la muestra

Klara PERAHYA Judeo-Espanyol
24 Aralık 2014 Çarşamba

En unos kuantos dias sera la fin de un anyo en munchas sirkunstansyas muy trajiko; i ‘formular kualkyer dezeo o palavra de esperansa para el proksimo ke vyene’ sera provablemente rizivle; ma no azerlo es komo abokar la kavesa delantre las tinyevlas de un futuro ainda mas obskuro.    

Mi nona dizia “todos no rien ni todos yoran el mizmo dia”. En efekto, afuera eventos muy raros ke aklaran en mizmo tyempo la vida de una persona i la de su entorno, todos  no tyenen, a la mizma ora, razones de alegrarsen ni de lamentarsen. Puedemos tambyen pensar ke para las ‘kriansas humanas sometidas al  kapricho de la fatalidad’ ke semos, mizmo la riza es  envezes empapada de amargura.

Komo pensar otramente kuando  meldamos en la prensa ke en el solo mez de Novembre, mas de 5000 personas muryeron a la sigida de asaltos djihadistos perpetrados por sus propyos korelijyonaryos?

El mez de desembre no parese ser mas klemente: En el Yemen, a la sigida de un golpe djihadisto de Al-Kaida: 26 muertos entre los kualos 16 ninyos. En el Pakistan, en un atako de parte de los talibanes: 148 muertos entre los kualos tambyen  kaji 130 ninyos. Todo esto komo si una maldisyon imperyoza kayo sovre el mundo.

La Evropa komo los Estados Unidos son eyos mizmos (kon mas o menos grande frekuensa) terrenos de aksyon para semejantes aktos de agresyon.

Es ke la Umanidad esta pedriendo su umanizmo? En todo kavzo, al pareser, eya esta bivyendo una de las epokas las mas dramatikas de su historya, komo si olas irrepresivles de horror se obstinan a des-umanizar el Ombre.

‘No revoltarmos’ es imposivle... En semejantes kavzos la indiferensya es kaji un akto de partisipasyon i el silensyo un krimen difisilmente perdonavle. 

En vezes mos demandamos si  no se trata de un reziduo leshano de los tyempos pasados i del kolonyalizmo  ke desho detras de el trasas dolorozas de humilyasyon. Es ke  varyos payizes del mundo Oksidental  ande enfloresen las mas grandes bushkidas syentifikas, no influensaron a la baza, puede ser sin enteramente rendersen kuento, la kreasyon de algunas de estas nebulozas terroristas? De mezmo una otra kestyon: “de ande vyenen  las armas sofistikadas empleadas por los ke atakan”?

Komo ya lo tengo dicho en una de mis presedentes eskritas, kuando la refleksyon se aze interrogasyon, munchas preguntas suven  a la superfisia del meoyo.

Para mozotros djudyos ke fuimos kontinualmente sometidos a la presyon de varyos peligros durante siglos i siglos de insertidumbre, muestro destino fue de syempre preguntar los akontesimyentos chikos komo grandes afin de eskojer el mijor kamino a sigir. 

Es lo ke es , todo en syendo konsyente ke es una utopia, me engancho a la esperansa de una mueva anyada mas humana para mozotros todos. Salud buena a todos i ke el anyo 2015 sea el empesijo de una larga epoka de paz, luz i voluntad de amistad, Amen.

PS: La polisia İsraelyana  kestyono 13 sitizanos djudyos sospechados de insitasyon  a la violensa (entre los kualos 4 adolesentes ke tenian sovre eyos kutchiyos i otros instrumentos semblavles de agresyon).Todos los tredje individuos son myembros de una organizasyon relijyoza djudia  anti araba, nombrada “Lehava”, la kuala se inspira de la maldicha  ideolojia  del ultra relijyozo “Meir Kahana,” fundador del movimyento rasisto “Kach” .ke tenia  komo prinsipyo de baza “la lucha absoluta, a ke presyo ke fuera, kontra el risko de una kulkyer pedrita de la identidad djudia”.