La famiya es el nido (yuva) ke fonda la mujer i el ombre endjuntos. Eya se engrandese kon las kriyaturas, ermanos, ermanas, nonas, nonos, inyetos, inyetas, tias,i tios.
La famiya es un konsepto (kavram) sakro, i la baza de la komunitad.
La manera de engrandeser i edukar es influente enriva de los chikos ke se forman kon las reglas (kural) de los paryentes. Kuando se engrandesen, kada uno i uno se komportan de una manera diferente. Esto mos aze pena, porke mozotros los grandes dezeamos ke se komporten komo keremos.
En el dia ke estamos bivyendo esto es imposivle. En esta epoka lo ke esta estruyendo las relasyones familyales, i el kontakto kon los mansevos es la teknolojiya i la televizyon.
No ay avlar, diskutir, la boka no esta djugando, porke los mushos se pueden kansar!...
Los dedos estan djugando, pizando a las tushes del telefon i del kompyuter. Solo mesajes, SMS i mail… No ay oyir la boz del den frente.
Boka por ermozura…
Todos somos ovligados de ambezarmos a utilisar todo lo muevo para pueder tener relasyones kon los ijos.
Komo de tyempo ke vinimos!...
Las relasyones entre los paryentes se estan aminguando de dia en dia malorosamente. Ay un aleshamyento (kopukluk) entre los mansevos i las madres i los padres.
El lavoro, las oras de lavorar oy, esta kavzando un poko esta separasyon (ayrılık).
Las relasyones familyales de antes, oy se esta vyendo malorosamente en los kazamyentos, funerales i los dias emportantes. Mizmo en las fyestas; los grandes se estan iyindo a viajar para no penar en sus kazas.
Para todo se kere un esforso (çaba), una veluntad muy grande. Kerer es azer, i reushir a arekojer todos los myembros de los paryentes en el doredor de una meza para kreyer la kayentura (sıcaklık), la entimitad i la senseridad entre todos, i pueder kontinuar las relasyones.
Shabat la noche estuvimos ande los kosfuegros; para selebrar sinko aniversaryos. El aniversaryo de ‘Anna’ (la kosfuegra), de ‘Nedim’ (el kosfuegro), de mi marido ‘Meir’, de mi ija i de mi yerno el luzyo.
Anna es una artista (sanatçı), una pintador (ressam) ke tyene un gusto muy fino, organizatrisa, un talente (yetenek) spesyal para dekorar la kaza, la meza i munchos otros detalyos ke kitan su identitad (kimlik) en medyo.
Arivimos a las mueve i kuando sonimos la puerta; mos arisivyeron kon maskas de kolores diferentes, una muzika espesyal, todo preparado i ordenado (düzenlenmiş) por su mano de una manera perfekta, un resivo muy kayente.
Kuando toda la famiya se adjunto; madre, padre, ermana, sovrinas, ija, ijo, inyeta i mozotros ke mos konsideraron komo los myembros de sus famiyas; estuvimos enkantados de ver la ermozura de kaza, adonada (süslenmiş) kon aksesoryos diferentes, duzudeados komo un tablo.
Enfin, Nedim ampeso a tanyer kon el akordeon una kantika grega, ke el padre ampeso a baylar ‘sirtaki’, i todos muy kontentes ampesimos a baylar en muestro lugar.
Ya era oras de komer.
La meza ordenada de rozas, de kandelas, las kumidas no se kere dicho…
La mas grande sorpreza fue ke Anna komo artista; izo dar a azer para todos una pasta propya (özgün) a si mizmo.
Por egzempyo; enriva de la mia aviya ‘una ventana’, i eskrituryas para sembolizar mi kanton del ‘Şalom’, enriva de la de mi ija komo eya lavora en ‘Microsoft’ aviya un kompyuter, enriva de la pasta de la sovrina un bebiko (komo esta prenyada), en la pasta de la ermana, komo eya es shampion del ‘Briç’; kartas de djugar, en la pasta de mi marido, el sembol de la loca de los masones i munchos otros detalyos, kada uno mas ermozo del otro.
Estava una lokura de ver,i la savor ekselante.
Komo de ermozo ke pasimos todos endjuntos!...
Mozotros devemos de arekojer a los mansevos, i a los aedados para kontinuar las relasyones i no alesharmos unos kon los otros en este dor, para ke muestros ijos puedan azer un poko de lo ke vyeron en sus kazas.
Lo ke vyene en primero en estas relasyones es la solidaritad i el ayudo en todo modo de situasyon.
A mi idea; la famiya es un konsepto sakro ke no se puede komparar kon nada. En la baza de este konsepto ay la ‘Amistad’, el ‘Respekto’, la ‘KERENSYA’ i la ‘Piadad’.
Los individuos (birey) de la famiya, partajamos muestra alegrias, mos atristamos endjuntos i bushkamos solusyones para los problemes. Todos mos ambezamos de muestra famiya; el respekto, i el kerer byen a las personas.
Nada en el mundo, no kale ke dezazga esta unyon fuerte, esta solidaritad.
La famiya tyene un rolo emportante para desvelopar la kreativitad de su ijo u ija.
En terminando kero dizir ke la famiya es; la Valor la mas Presyoza i la mas Grande en la vida.
Kedavos syempre kon la luz de la Kerensya i de la Amistad de vuestras Famiyas…
