Tal ke fue el kavzo por la interviu akordada de parte de Frederic Encel a la revista ‘Tribune Juive’ de la kuala vos prezenti la semana pasada un chiko rezumen, ago lo mezmo en el prezente artikolo konsernando la segunda entrevista sovre el mizmo sujeto echa kon Douania Bouzar de relijyon Muzulmana i nasyonalidad Franseza, anthropologa eksperta (en el Konsilyo Evropeo) de kavzos i problemas relijyozos ansi ke de la jestyon i de la administrasyon del laisizmo.
En su ultimo livro intitulado ‘Ils cherchent le Paradis, ils ont trouvé l’enfer’ (Bushkan el Ganeden, toparon el infernyo) la autora analiza las thematikas del djihadizmo aktual i los medyos ke sus myembros meten al servisyo de sus ideolojia.
Douania Bouzar revyene partikularmente sovre la nesesidad ke ay aktualmente de una mobilizasyon global kontra los proyektos del terrorizmo djihadisto.
En vuestro ultimo livro intitulado ‘’İls cherchent le Paradis, ils ont trouvé l’enfer’’ avlash de la terrivle sufriensa de los paryentes ke tyenen ijos o ijas en este movimyento ultra radikal. Seria interesante de saver a la sigida de ke argumentos estos adolesentes fueron atraktados i ansi doktrinados?
Douania Bouzar: El diskorso djihadizto ultra radikal les aze kreer ke el sentimyento de mal-estar ke eyos resyenten kon sus paryentes o amigos ke pensan de una manera diferente, provyene del fakto ke eyos fueron eskojidos por ‘’Allah’’ para ayegar a la Verdad i ke ansi tyenen una poder de entendimyento i de disernimyento ke los otros no posedan. De esta manera, kuando sus serkanos se esforsan de azerles entender razon, eyos se topan delantre una pared impenetravle i por syempre sodra.
Es ke ay un ‘komun denominador’ entre las jovenas i los jovenes de los kualos avlash en vuestro livro?
Douania Bouzar: No ay ningun komun denominador entre eyos. Las ijas ke reprezentan 50% de los endoktrinados, son atraktadas por motivos i aksyones mas o menos humanitaryos, komo por egzempyo la lucha kontra la ambrera o kontra la intoksikasyon de ninyos en Siria ets… Sus objetivo es jeneralmente de salvar lo mas posivle de vidas muzulmanas. En varyos kavzos eyas son briyantes i muy sensivles, ijas de famiyas ekonomikamente medyanas i mizmo envezes muy rikas.
Los ijos son de klasas sosyales diferentes. Se topa entre eyos unos kuantos idealistos prontos a defender sus korelijyonaryos, ma tambyen munchos ansyanos toksikomanes i akuzados de delinkuensya.
Aktualmente a la sigida de la instalasyon del grupo İŞİD en İrak i Siria, es la bandyera del terrorizmo ke domina kon un dezeo i un esprito imperativo de vengansa.
Dos themas esensyales son empleados. El primer es ’el komploto kontra el Islamizmo’, el segundo ‘ke el mundo se aserka de su fin’. La vizyon de un universo apokaliptiko es syempre prezente, los doktrinadores anunsyan una desgrasya destruyidera sovre las tyerras de Sham; ‘el fakto ke Bashar el Asad gazeo su puevlo en la impunidad i la indiferensya internasyonal’ signifika para eyos ke la fin del mundo es para amanyana, i ke eyos nasyeron para rejenerar el mundo.
Komo tomara fin esto todo? Vuestro livro dize ke el espasyo de vengansa de estos mansevos no es solo la Siria ma el mundo entero, i ke sera katastrofiko ke la Komunidad İnternasyonal (sin azer un djesto) deshe los djihadistos matar muzulmanos ke pensan otro modo ke eyos.
Douania Bouzar: Eskrivi esto en el mez de Djulyo i era premonitaryo…Los payizes demokratikos no empesaron a intervenir ke solo kuando los kristyanos i el puevlo Yezid fueron masakrados.
Munchas personas pensan ke antes de todo es el dover de los Muzulmanos i de los responsavles de sus Organizasyones de manifestar i luchar kontra el Djihadizmo terroristo de ‘Alkaida’, ‘Al Nosra’, ‘Boko Haram’, İŞİD/(EİİL),ets...
Douania Bouzar: Oy es komo sitizanos libres, humanistos i solidaryos ke devemos luchar todos endjuntos kontra esta ideolojia totalitarya ke kere eksterminar el resto del mundo.
No mos olvidaremos ke la muzulmanofobia les permete de enforteser sus thema prinsipal el kual afirma ke ay un komploto kontra el İslamizmo i esto afin de djustifikar sus proyektos de eksterminar los ke tyenen kreensas dlferentes de las suyas. Eyos emplean pasajes de ‘relatos historikos’ ke figuran puede ser en el Koran i se olvidan de los prinsipyos de baza del livro sakro ke egzijen el respekto por los otros. Ansi, so profundamente konvensida ke sera muncho mas efikas si (afuera de muestras kreensas relijyozas diferentes) mos aunamos todos en muestras konviksyones demokratikas.
El objetivo del djihadizmo terroristo es de deshumanizar el mundo. Mos aunaremos afin de mostrar ke semos todos semblavles. Entonses la larga kavena humana sera viktoryoza i puedra venser el odyo i la inimistad.
