Estamos kontinuando muestro torno a lo largo del Bosfor.En lo ke konserna los koshkes i los yalıs fraguados para altos ofisyales i otros “pashas”, lo mas eran en tavla. Pokos arrivaron a muestros diyas. Estan debasho proteksyon, restorados afin de konservarlos komo testimonio del pasado. Estas fraguas de tavla relativamente chikas, en un tur de vapor se pueden distinguir achakes de sus kolor (jeneralmente) kolorada. Komo lo ize remarkar, munchas vizyones kedaron en las tualas de los pintores, en las gravuras de los artistos, dandomos una idea sovre la arkitektura de la epoka.
Artistos reproduizaron no solo el Bosfor, ma tambien diferentes vizyones de Estambol komo la Torre de Galata, las meshkitas i “Fontanas” (fuentes) maraviyozas i otras. Ma, komo lo dishe en mi primer teksto, el Bosfor syempre tuvo una atraksyon diferente. En este kuadro, el distrikto de Bebek es un egzempyo ekselente. Puede ser es por esta razon ke nombrimos mas muncho este Sentro, aktualmente tambien “en vogue”. Tarabya, Rumelihisar, Bebek ets... fueron i son oy en diya lokalidades espesyalmente preferidas por los estranyeros instalados en Estambol.
Bebek es un adreso ke no troko desde anyos, mizmo desde siglos para los artistos, fotografos i pintores. Naturalmente, el Bebek, o mas egzaktamente el Bosfor aktual tienen una aparensya muy diferente. Nombrozos artistos fueron atirados por las “kolores” de Estambol. Entre los artistos estranyeros de la epoka, en desparte de Melling, puedemos sitar Bartlett, Brindezi i dar kurtas informasyones sovre eyos i sus lavoros. Enkantados i entuzyazmados de la atraksyon de Bebek izyeron diversas gravuras del distrikto. Desharon ovras presyozas, testimonios de una epoka...
A la eksepsyon de syertas gravuras de Estambol, el elemento “personaje” no se ve tanto en estas ovras. Portanto, Bartlett lo konsidera komo un faktor kompletando el lavoro i dandole sinyifikasyon. No se kontenta de pintar unikamente el peyzaje, kualkyer ke seya. De sorte ke prefera reflektar i los personajes, kon las vestimyentas de la epoka de antes la reforma ke izo el Sultan Mahmut II.
William Henry Bartlett, arkitekto i pintor inglez vino a Estambol en 1835. En syertas de sus ovras pinto i djudios.En su famozo lavoro “Yılanlı Yalı” pinto los djudios kon “anteri” vedre, “potur” i “galechas”…Tengo meldado ke antes el “Ferman de Tanzimat”(*) los djudios de las Tyerras Otomanas eran ovligados de vestirsen ansi (Adjusti esto komo un detalyo enteresante).
Entre los artistos estranyeros de la epoka, atirados por Bebek, se puede sitar tambien el pintor italiano Giovanni (Jean) Brindesi. Bivyo en Estambol en los anyos medyanos del 19.Siglo. El tambien desino en sus ovras diversos tipos de la epoka, komo vendedores delantre la Torre de Galata, los paseos de las mujeres del “Harem” en barkas ets... Arrekojyo estos lavoros en su livro “Souvenir de Constantinople”. El tablo panoramik de Giovanni Brindezi amostrando los peshkadores de Bebek es un Kapo de Arte.. Asigun las kritikas, reelmente es una ovra enkantadera, ande se puede ver afilu los minimes detalyos de esta famoza seksyon del Bosfor.
(*?- Tanzimat: Reformas Ottomanas (1839-1876). Perioda de 35 anyos en lakuala, al egzempyo del Oeste, se realizo reformas estrukturalas politik, sosyal i ekonomik en el İmperio Ottomano. Los Estados Evropeos ke se konsideravan komo los protektores de las minoridades, portanto toparon insufizyentes los derechos akordados a los grupos etnikos. Este protesto tuvo komo konsekuensa de proklamar en 1856 un dekreto muevo en favor de los sujetos otomanos non muzulmanos (minoridades).
A kontinuar...
