ESTAMBOL: Sivdad de Mil Fachas -6

Judeo-Espanyol
12 Kasım 2014 Çarşamba

Constantinople, sivdad aprezada entre las murayas de la Era Medieval, no se konosiya dayinda komo “Estambol”. Gradualmente empeso a travar la atansyon de viajadores, pintores, eskrivanos estranyeros, espesyalmente en la perioda briyante del Imperio Otomano. Estos artistos, en diferentes formas i  diversas maneras, reflektaron syertos lugares, sentros o distriktos  de la Kapitala de entonses.

 Muy probavle ke munchos de entre mozotros tuvimos nombrozas okazyones de enkontrar estas ovras...Tablos, gravuras ke reflektan el pasado i arrebiven fraksyones de la Historia. Los vemos en vezes en forma de grandes “panos” en sentros turistikos, en los oteles i diversos lugares. La majiya inkontestavle de Constantinople, el misteryo oriental de esta sivdad, de los  palasyos i espesyalmente, la ermozura del Bosfor a kada epoka inspiro no solamente los poetas i eskrivanos, ma tambien los pintores  i artistos de gravura.

 Los ansyanos nombres de manadero grego de syertos distriktos, komo “Therapia” (Tarabya) o de “Stenos” (İstinye) ets.. mos azen pensar ke el Bosfor fue todo el tyempo un espasyo de abitasyon mizmo antes munchos siglos... Afilu antes la konkuista de Constantinople en 1453. Portanto no ay bastante prevas konkretas para sostener esta ipoteza.

En la mitad del 17. Siglo estamos vyendo el Bosfor abandonar poko a poko su karakter de kazal, su aparensya “champetre”. Entonses, es el empesijo de la era de “Koshkes” en Beylerbeyi, en Kandilli o Emirgan o otros diversos sentros en la oriya del Bosfor...“Sarayes, Palasyos” al bodre de mar. Palasyos de diferentes dimensyones para el Sultan i su enturaje... Kon tyempo, se estan vyendo no solo en el Bosfor, i en los bodres del Kuerno d’Oro (Haliç) tambien... Estas  fraguas en jeneral, de dimensyones mas chikas, se nombran “Kasır”. En tal ke egzempyo puedo sitar el “Küçüksu Kasrı… 

En el 18. Siglo, empesa la Era de “Yalı”, somptuozas villas a la oriya de la mar. Oy en diya se ven estas “Rezidensyas”  i se konosen kon el nombre del importante personaje o “Pasha” a kual aperteniya.

Aki una chika paranteza. Devo dizir ke komo syempre el azardo otruna vez me izo de ojiko!!. En preparando este teksto (06-10- 2014 lunes) vide en la T.V el program“Paha biçilemez İstanbul” (Estambol, Sivdad sin Presyo). Djustamente se esta avlando de estas fraguas ilustras  i mezo el ekran vijitando unas kuantas de eyas tambien. Reelmente no ay presyo para las rikezas i antikitas ke ranferman. Mos estamos ambezando ke una de estas rezidensyas servyo de dekor myentres el turnaje del famozo filmo “TOPKAPİ”, kon Melina Mercury, Peter Ustinov ets…  

 Dunke, en esta era, un muevo stil de vida muy lusyoza esta tambien ampesando.  El reflekto de la perioda konosida en la Historia del Imperio, komo “Lale Devri”* (la Era de la Tulipa) ke, a syertas etapas de muestros estudyos la meldimos en lisyones de Historia.

Se puede dizir, en el 19. Siglo la oriya del Bosfor se incho de este djenero de fraguas. Estos palasyos de diversas dimensyones en mayoriya en beton, aparteniyan a la klasa dirijente. Ampesando de Dolmabahche a azer un torno de vapor, a lo largo del Bosfor puedemos ver algunas de estas fraguas. Entre los mas importantes palasyos, en la Kosta Evropea “Dolmabahche”, “Chiragan”. En la Kosta Asiatika el “Palasyo de Beylerbeyi”  ets…

A kontinuar...

* Notisya: Lale Devri (1718-1730)... Perioda markando los primeros pasos echos en el İmperio Ottomano, al egzempyo de la Evropa. Fue tambien una era de gastes i divertimyentos egzajerados. La Tulipa, simbolizando la  manera de vida de la alta klasa, dyo su nombre a esta epoka. La kareza de vida adjustada a las taksas enormas impozadas al puevlo, kavzo una grande indinyasyon, sinyal del empesijo de solevantamientos kontra el Palasyo. De sorte ke esta perioda de 12 anyos se termino trajikamente kon demostrasyones sanginaryayas.