Muy Keridos Korelijionarios
En estos diyas ke estamos en la entrada del anyo 5775 de nuestra kalandaria el dezeo el mas adekuado sigun mi es esto ke teine lugar tambien en nuestras suplikasiones de Selihot:
“Tihle Şana Vekilelotea, Tahel Şana Uvirhotea”
“Akave Anyo i su maldades Empese anyo kon su fekondansas”
En verdad ke este anyo ke estamos terminandolo, tuvimos bastante molestias seya en senso de la kolektividad i seya en senso individual. Ma grasias a nuestra konfiensa i refujio a El Todo Poderozo sovresaltimos de esto kon el minimo danyo. Kero rengrasiar i agredeser a nuestros dirijentes de la komunidad por su cudiadozo i sansible komporto ke tuvyeron en este periodo.
Keridos Ermanos
Kaji siempre repeto ke “Rosh Hashana” i “Yom Kipur” ke sigue es una oportunidad muy emportane para pueder azer un examen de konsensia sovre nuestra kondukta i yamo a nuestros korelijionarios a la “Teshuva”. Klaro ke esta oportunidad no es la ultima porke el Santo i Bendicho El esta siempre dispuesto a akseptar la “Teshuva” de todos nozotros. Mi dezeo es de rekordarvos en estos diyas ke tanto se pospone la “Teshuva” tanto es retardada.
Penso ke la advertensia ke resitamos en nuestra “Selihot” nos konserna a todos nozotros:
“Arhek Midarhe Bene Adam Veshur Darhe Gevoeha”
“Aleşate de konduktas Vulgaras i torna a konduktas de alturas”
En este kampo a todos nos kaye responsabilidad ma sigun mi el mas grande rolo es de nuestras mujeres ke son el fundamento de nuestras kazas i de las senyoras nuestras kompanyeras. No solo ke son las transmetedoras de nuestre santa ley a la nuevas jenerasiones, sino ke en este periodo toman parte en todo modo de ovra komunal pionieramente i meresen a lo mas bueno de todo. Kero prezentar mis agradesimientos a estas bendichas dammas i esto siguro ke trambien vozotros compartirash estos sentimientos miyos.
Keridos korelijionarios
Este anyo ke lo estamos kompletando fue tambien un periodo de rekuperamiento eksitozo en senso de pueder regalar a nuestra juventud un lokal moderno i fonksional ke ya lo meresen, tambien un nido konfortable a nuestros aedados i menesterozos. Kero agradeser y rengrasiar a todos ke tomaron parte en este asunto seyan los dirijentes de nuestra komunidad i seyan los miembros de las institusiones relevantes i les suheto muncha reushita en su esforsos futuros.
Keridos Ermanos
Esto bien konvensido ke las orasiones ke vamos alsar todos encuntos en estos diyas de “Yamim Noraim” nos va aserkar mas al meresimiento de la mizerikordia i a la perdonansa de El Todo Poderozo.
Siendo yeno de estos pensamientos i sentimientos vos felisito de las onduras de mi korason i vos suheto ke alkansesh a munchos anyos juntos kon vuestras famiyas, keridos i serkanos yenos de sanedad, prosperidad i pas.
Tizku Leşanim Rabot - Şana Tova Umeuşeret
Rav İsak HALEVA
Gran Rabino
