Djueves el 24/7/2014 Shimon Peres konfio el mandato de Prezidensya del Estado Israelyano a Reuven Rivlin

Klara PERAHYA Judeo-Espanyol
6 Ağustos 2014 Çarşamba

Si, Djueves el 24 djulyo 2014  Shimon Peres konfio el Mandato de Prezidensya del Estado İsraelyano a Reuven Rivlin eskojido por la mayoria del Parlamento  para okupar este posto syempre de nesesidad krusyal en un payis demokratiko en perpetual inseguridad.

Komo por seguro ya lo saverian nombrozos de mis lektores, la karrera politika de Shimon Peres fue larga i fruktuoza: Ministro durante el mandato de varyos Governos, el okupo  tres vezes el posto de Primer Ministro. La primera vez provizoryamente en 1977, la segunda de 1984 asta 1986, i mas tadre de 1995 asta 1996.

El fue Shefe del partido travayisto durante multiples anyos, antes de adjuntarse al partido Kadima en el anyo 2005.

Premyo Nobel de la Paz en 1994  endjunto kon Yitzhak Rabin i Yaser Arafat, Shimon Peres fue elijido Prezidente del Estado de Israel en 2007.

El posto de Prezidenya de Shimon Peres no fue solo una simple funksyon de reprezentasyon de Israel serka de los grandes Estados del Mundo, este mandato fue una lucha de kada dia  para mantener kon el vezindado i el governo palestinyano relasyones de dialogo. El se esforso de ser para la populasyon djudia komo tambyen para la muzulmana de su payis  ‘’un djenero de padre i de konsejero’.

Kolavorador  de Ben Gourion, Shimon Peres es oy en dia “el ultimo sovrebivyente de los ke fueron los fundadores del Estado Hebreo.

Veterano de la Politika İnternasyonal, profundo en su pensamyento,  ekitavle en su djuzgamyento i syempre novle en sus desizyones, el fue syempre kapavle de ver muncho mas leshos kel prezente, los ojos fiksos sovre un futuro ke se anunsya la mas parte del tyempo kargado de difikultades,  sin por esto  nunka  renunsyar a ovrar para una pasifikasyon ke puedra renforsar la seguridad de su payis.

 El es aktualmente partizano de la kreasyon de un Estado Palestinyano independyente, lado kon lado kon el İsraelyano, lo ke puedra muy provablemente asegurar en el futuro una situasyon de oto-responsavilidad de kada uno de entre eyos,  i ansi de posibilidad de no-belijeransya entre los dos .

 En su diskorso de partensya el avlo ansi:”Los profetas ensenyaron a Israel a konsiderar ‘la djustisya sosyal i la paz en el mundo’ komo un prinsipyo direktor i demandaron al Estado djudyo de praktikar la igualidad para todos los sivdadinos... No vo renunsyar a mi derecho de syempre servir mi puevlo i mi payis, kon la esperansa  ke un dia el konosera la Paz”

Es evidente ke ( todo el tyempo ke esto no konstitue un kualkyer reziko para la egzistensya de su payis) Shimon Peres  es antes de todo (lo repeto) un Ombre de Paz,  un padre ke rekonose la valor sin presyo de kada vida amiga o enemiga.

Para kualkyer persona sezuda ‘Bushkar la paz’ no es someterse inutilmente, ni trahisar sus preseptos o kreensyas, al kontraryo es afirmarlos.

Ke el salga viktoryozo o vensido de un konflikto ensangretado,  la gerra es la mas parte del tyempo una derrota par un payis i  syempre una desfecha de la Vida kontra la muerte.

 Desde muncho tyempo antes, Shimon Peres ya avia  entendido ke kada dia de gerra ( ke eya sea djustifikada o no) es una gota suplementarya de ‘odyo’ i de ‘esprito de vengansa’ ke kaye en el korason del enemigo  ...Ansi, aun las olas  de kritikas de una partida de su puevlo, el tuvo syempre el ‘sehel’  de ovrar para negosyasyones ke puedran evitar una ruptura definitiva kon el  vezindado.

Para Shimon Peres la grandor de un payis no se kalkula simplemente sovre el diametro de sus tyerras, ma prinsipalmente sovre la valor pozitiva de todo lo ke el parvyene a ofreser a la sivilizasyon.