Mase

Rav Yeuda ADONİ Köşe Yazısı
23 Temmuz 2014 Çarşamba

Estas son las movidas de los ijos de Israel, ke salyeron de la tyera de Ayifto, por mano de Moşe i Aaron. I Moşe eskrivyo sus salidas sigun sus movidas por dicho de Dyos.

Moşe Rabenu sovre el orden del Kriyador eskrivyo los nombres de kuarenta i dos luguares ke pasaron los ijos de Israel en el dizyerto. El eskopo de mansyonar los nombres de estos luguares fue: por ke sepan las jenerasyones vinederas las maraviyas ke izo el Kriyador a nuestros padres en los kuarenta anyos ke estuvyeron en el dizyerto. Komo eskrive en la Tora: “El Kriyador no te afriyo, te arto, te izo komer pan, tu vistido no se envejesyo de sovre ti.

En el midraşTanhuma dize: i una razon ke kanta en el perasha de Mase estos kuarentas i dos luguares ke estuvo el puevlo Cudyo es, por dar merito a estos luguares ke abrigaron a los ijos de Israel. I la leson ke se puede kitar de este pasaje es; un dizyerto ke abrigo a la jente tuvo merito de Dyos, si una persona abriga i arta a los menesterozos no kere dicho, ke grande merito tyene verso el Kriyador.

Los nombres de los luguares ke pasaron los ijos de Israel fueron dados sigun los pasajes ke afitaron ayi “Kivrot ataava” el luguar onde enteraron sus dezeos, “Mara” onde bevyeron aguas amargas i se las adulso el Kriyador mezo Moshe Rabenu “Refidim” onde estavan floshas de kreyensa. El Midrash dize a el avenir el Kriyador los va pasar de nuevo por estos luguares de el dizyerto komo dize la profeta Yehezkel vos vo traer a el dizyerto. Kuando el puevlo cudyo en el dizyerto estava inchendo los diyas i los anyos ke deviyan kompletar, teniyan una konfiyensa grande en Moşe Rabenu i kreyensa en el Kriyador. Por esta razon meldamos en el livro de Yermiyau: “Me akodro las mersedes de tus mosedades, komo kaminates kon grande kerensya detras demi.”