Antes tres semanas, ize un viaje a la Tyerra Santa para vijitar “Fortüne İzak Pinhas”; los grandes donatores de la eskola “Ulus Musevi Lisesi” i de las diversas organizasyones de muestra komunitad.
Me arisivyeron komo una reyna i pasimos tres dias mirakulozos endjuntos, en el otel en Tel-Aviv.
Entonses vos kero azer konoser a “İzak Pinhas”; ke tyene un korason de oro i ke ayuda a todo modo de nesesitades en muestra komunitad. El empeso a lavorar de ocho anyos fina oy, i esta kontinuando kon ardor, kon su mujer “Fortüne Pinhas”; una persona sezuda, entelijente i muy kapache. Eyos tyenen una mandra de kezos en Israel, ke el nombre es kezos de “Pinhas”, i marido i mujer lavoran endjuntos.
Eyos azen donasyones, a los ke tyenen difikultades en las eskolas por la edukasyon (eğitim) i el ensenyamyento (öğretim), dan burses a los elevos para ke puedan reushir sin tener problemes.
Verlos sanos i aktivos me izo grande plazer.
Las donasyones ke azen a los mansevos, es una valor inolvidavle.
El Dyo ke este syempre kon eyos i ke nunka no manken de muestra kavesera...
El enverano es una sezon ke traye la felisidad i el entuzyasmo (coşku) de bivir. Es una sezon kayente.
Las personas pueden profitar de las ermozuras de la natura, de la mar, del sol ke melizina los romatizmos.
Los dias se alargan, las noches se akurtan.
Los pasharos empesan a kantar kon sus bozes ermozas, las yervas se engrandesen, las flores enfloresen en los kampos.
Esto todo aze sentir a la persona orozo de todo modo de evenemento.
Munchos de mozotros se van las vakansas, viajan, otros se van a las islas. Pasamos el dia entero afuera, en las kayes. La natura se aribive, i esto es la kavza de ser mas optimistos i mas positivos.
Burgaz es un kazal ke todos son komo una famiya. Komo mos arisiven los ke moran aya en invyerno!...
El kasap, el frutero, el bakkal, el vendedor de agua, el patisyero i los arabacis…
Es un privilejyo (ayrıcalık) de pueder iyir a esta isla maraviyoza. El aver limpyo, la mar a dos pasos, el kalmo mos repoza de la vida kanseryoza i reboltoneyoza ke tenemos en la sivdad. Kale ke sepamos la valor de esta rikeza.
Ma; malorosamente syempre topamos sujetos de kritikar.
Komo los mansevos estan lavorando muy duro i sin tener oras egzaktas, la kaza de la sivdad kon la kaza de la isla estan avyertas. Esta situasyon esta kansando a las mujeres ke keren el orden i la limpyeza menesteroza en las kazas.
Enfin; pueder topar la felisidad kon chikos plazeres en la vida es una kalitad espesyal i depende del karakter de la persona. Por enalteser en enverano muestra enerjiya; kale en primero echar tino a lo ke estamos komyendo i bevyendo.
Kale komer mas muncho zarzavat i fruta; bever muncha agua.
Kale estar i pasar el tyempo kon las personas ke tyenen una enerjiya alta.
Si tenemos una solidaridad entre mozotros, si mos adjuntamos (birleşmek) en primero en muestras ideas, i si keremos byen al den frente, la vida sera mas fasil i va mos a topar la felisidad.
Biviremos el momento (anı yaşamak); porke la vida es solo este momento...
