Kuando i ke sera la fin del konflikto entre İsrael i el Hamas?

Klara PERAHYA Judeo-Espanyol
16 Temmuz 2014 Çarşamba

“La gerra tyene su propya dinamika. Eya puede yevar sus protagonistos muncho mas leshos de lo ke eyos dezean” mos dize el diaryo fransez” -Le Monde- en uno de sus editoryales de la semana pasada.

En efekto munchos  analistos reputados  por la imparsyalidad de sus komentaryos, pensan ke en el konflikto aktual entre el Hamas i Israel, ningun de los dos partidos dezea realmente su prolongasyon,

El Hamas fue el primer a violar el akordo frajil ke egzistia entre los dos vezinos, el fue el primer a mandar roketas sovre el Sud de Israel i poko mas tadre en los grandes sentros puevlados del payis.

De su parte adresandose al kampo enemigo, Israel repeto syempre i repeta ainda agora; ‘Renunsya de mandar roketas sovre muestro payis! i immedyatamente mozotros vamos a meter fin a muestros atakes aeryanos’.

Desde el empesijo de las hostilidades Binyamin Netanyahu ya avia informado el Movimyento Islamiko, ke iva realizar una operasyon de grande dimensyon si el kalmo no era respektado, ma el Hamas no tomo en konsiderasyon la amenaza i rompyo el ultimatum de 48 oras ke le fue fiksado, fakto ke dyo al primer Ministro  Israelyano la libertad de anunsyar ke İsrael se topava en el derecho de defenderse.

En los bombardamyentos de parte de las fuersas aeryanas İsraelyanas el objetivo no es nunka la populasyon  ma los lugares estratejikos de ande parten los projektiles asasinos kontra las sivdades i los kazales djudyos... Las otoridades del Hamas ya saven esto, ma al lugar de plasar los  sityos perikolozos leshos de sus populasyon, eyas los establesen en los puntos los mas puevlados del lugar.

En este kavzo ke puede azer  İsrael kuando su vezino kontinua a embiar sovre sus tyerras ‘luvyas de roketas’ ke tyenen la posivilidad de matar sus sitizanos? Protejar su puevlo ? o byen entregarlo a la krueldad de un enemigo ke repeta kontinualmente su dezeo de eradikarlo por syempre de la karta jeografika del Oriente Medyano?

En la revista franseza “le Point-” Armin Arif mo ambeza ke el jeneral Almoz, porta-boz de la armada İsraelyana, konfirma ke en efekto ‘Son unikamente los lugares de ande parten las roketas del Hamas ke son apuntados i destruidos’...

De su parte un profesor de Siensya Politika de la Universidad Avyerta de İsrael dize: “La operasyon nombrada ‘Oriya protektora’ fue kreada en repuesta a las  40 roketas travadas Lunes 7 Julyo de la semana pasada sovre el Sud de Israel, de parte de‘las brigadas Al Qassam’  ke konstituen el braso armado del Hamas”. 

Estamos realmente bivyendo dias partikolares, dias ande en munchos korasones djudyos  se desperto un intenso interrogartoryo echo en mizmo tyempo de sospecho i de  dubyo.

Kuando la prensa mos anunsya el shifro de siviles i partikularmente de ninyos  muertos en el kampo de Gaza, no es solo los Palestinyanos ke yoran, munchos djudyos  tambyen syenten realmente en eyos un sentimyento de sinsera amargura.

Ma entonses, una kestyon mos vyene al tino, “ke bushkan los ninyos Palestinyanos en estos sityos ande se topan los aparatos destinados a echar roketas a las sivdades djudias, i esto malgrado ke İsrael ya avia deklarado tan klaramente ke son djustamente estos lugares ke son apuntados?

La semana pasada tambyen, munchos fueron los djudyos ke yoraron en mizmo tyempo el martiryo de los tres adolesentes İsraelyanos ‘Naftali Fraenkel’, ‘Eyal Yifrah’ i ‘Gilad Shaer’, komo tambyen la muerte indjusta i atros del manseviko Palestinyano ‘Mohamad Abou Khdeir’, muerte por lakuala  la Djustisya Israelyana se metyo immedyatamente a la bushkida de los kulpavles djudyos, los kualos  fueron identifikados i arrestados en el espasyo de poko tyempo  i sometidos a la rigor del kodigo punitivo adekuado.

El Primer Ministro Binyamin Netanyahu el mizmo telefono personalmente al padre de la viktima i en mizmo tyempo ke sus sinseras kondolensas le ekspreso klaramente su indinyasyon por la krueldad de unos de sus propyos sitizanos.

Ma oy, oy la situasyon es enteramente diferente, oy el tyene el dover imperyozo de salvaguadrar la vida de su puevlo.

Los golpes İsraelyanos no son golpes de atako ma de defensa i la diferensya entre los dos es enorme,

Martes de manyana: El ‘Kabineto de Seguridad İsraelyano’ aksepto la propozisyon de ‘sesar el fuego’  echa lunes por el Ayifto, ma el ‘Movimyento İslamisto Hamas’ ke kontrola la Banda de Gaza, la refuzo pretekstando ke no akseptara una interrupsyon ke solo despues un akordo kompleto del konflikto ke lo mete en estado de opozisyon kon Israel.