Una famiya Judiya Fuyeron de siria a Israel

Dora NİYEGO Judeo-Espanyol
9 Temmuz 2014 Çarşamba

Las semanas ke pasimos, una famiya judiya fuyeron de Siria a İsrael. Pasaron de munchos lugares danjerozos, gardados por militares de Bashar Assad, i otras fuersas de la opozision. A la fin, reusheron de salir de Siria, i arivaron a İsrael.

Un tiempo, aviya una komunidad floresiente en Siria. Oy, solo vente judios kedaron en Siria. Estos vente judios esyan biviendo en Demasko.

La operasion fue fasilidada por Moti Kahana, un ombre de negosio israeliano-amerikano, ke se okupa de los esfuersos umanitarios para los refujianos sirianos. En el korso de estas aktividades, Kahana formo relasiones kon los lideres de la opozision siriana, i ansi puido ayudar a esta famiya para fuyirsen del pais.

La Ajansia Judiya i el Ministerio de Emigrasion estavan al koryente de estos esfuersos sekretos. Los miembros de la famiya (no kijeron dar sus nombres a la presia) estan biviendo en un sentro por los emigrantes, en el norte de Tel Aviv. Para trayer la famiya a İsrael, Kohana tomo la ayuda de las Fuersas de los Aeroplanes İsraelianos.

El Primer Ministro Binyamin Netanyahu se reunio kon Lusky, i los reprezantantes de su organizasion la semana ke pasimos. Netanyahu se reunio tambien kon el muvimiento Scouts de İsrael, ke arekojejieron tones de alimentos, kuras, ropa, i otras nesesidades para los refujiados sirianos. Netanyahu alovo las aktividades de la organizasion Scouts.

Deke Siria empeso a permeter la emigrasion de los judios en el anyo 1992, la majorita de la komunidad judiya empesaron a irsen a İsrael, o a los Estados Unidos. Los ke kedaron en Siria son ayedados. No kedo ni mansevos, ni kreaturas judiyas en Siria. Los judios estan biviendo en una rejion kontrolada por el rejim de Assad. Assad no tiene dingun problem kon los judios sirianos. El tiene problem kon los israelianos.

İsrael esta kontinuando a embiyar karne kasher i vino kasher a los judios ke kedaron aya, en las fiestas. Les estan embiyando tambien todas las nesesidades relijiozas.

Los judios ke estan biviendo en Siria, estan mirando a mentener las propriedades de la komunidad. Se estan okupando de la Sinagoga, i de las tombas. Estan diziendo ke no ay dinguna amenaza kontra los judios en el pais, ma tambien no ay mas futuro por los judios sirianos.