Desde kaji dos semanas madres i padres en estado de anksyedad mesklada de esperansa

Klara PERAHYA Judeo-Espanyol
25 Haziran 2014 Çarşamba

Todo komo lo izo Michelle Obama en los Estados Unidos afin de aktivar la liberasyon de las estudyantes  Nijeryanas kapturadas de parte de Bokoharam, la Primera Dama de Israel Sara Netanyahu mujer del Prezidente del Governo Israelyano, sostyene tambyen la kampanya ‘Bring Back our Boys’ ke yama al retorno de los tres adolesentes kapturados  muy provablemente por fuersas enemigas.

Desde 14 dias, Israel i el puevlo djudyo en su totalidad  estan en estado de anksyedad i de aspero, tremblando por la vida de los 3 estudyantes  Naftali Fraenkel, Eyal Yifrah i Gilad Shaer kapturados sovre el kamino en direksyon de Yerushalayim.

En los korasones puja de dia en dia mas un terrivle atemo ke ningun byervo en kualkyer lingua puedra ekspresar totalmente… Madres anksyozas guadran los ojos fiksos sovre un horizente de ande tyenen la esperansa de ver  espuntar  las siluetas  tan dezeadas de sus ijos.

Al pareser (segun lo ke meldi en el ‘Jerusalem post’) uno de los tres mansevikos parvino, al momento mizmo de la kaptura, a komunikar immedyatamente  la situasyon a un posto de Polisia, ma (kolmo de desgrasya) el ke resivyo la yamada  no supo interpretar la gravidad i la urjensya  del mensaje i tadro a transmeterlo a kualkyer organo ofisyal responsavle.

Apenas informadas, las fuersas adekuadas İsraelyanas se metyeron immedyatamente en aktividad i oy ainda son syempre en estado de bushkida de los tres adolesentes salvajemente arrevatados, arrestando munchos myembros del Hamas sovre los kualos persiste un sospecho...

Benyamin Netanyahu afirmo ke tyene la sertitud ke este akto inyovle fue perpetrado por las fuersas fanatikas del Hamas i Mahmud Abbas Prezidente de las Autoridades Palestinyanas  deklaro “Tenemos la esperansa ke los tres adolesentes seran topados en vida, porke eyos son kriansas humanas i no akseptamos el rapto de kualkyer persona inosente.” 

Riad al-Maliki Ministro del eksteryor Palestinyano afirmo ke malgrado la ravya ke susita el inakseptavle movimyento masivo Israelyano de arrestasyones en el espasyo palestinyano, Mahmud Abbas kontinuara a ayudar Israel en su esforso de meter fin a esta kriza.

De su parte, la Ministra de la Djustisya İsraelyana Tzipi Livni rengrasyo el Prezidente Palestinyano por su intervensyon. Eya disho “Abbas’s words reflect the true reality, Palestinian leader vows to help Israel find the 3 boys, though he criticizes Netanyahu for exploiting situation” (las palavras de Abbas reflektan la verdadera realidad. El leader Palestinyano dezea ayudar Israel a topar los 3 adolesentes aun ke en mizmo tyempo el kritika Netanyahu de ekspluatar la situasyon)

Vyernes pasado, Benyamin Netanyahu i su mujer enkontraron personalmente los paryentes de Naftali Fraenkel, Eyal Yifrah i Gilad Shaer para diskutir  del desvelopamyento de las bushkidas afin de topar los jovenes. Esto fue el primer enkontro entre el Primer Ministro i los jenitores direktos de los adolesentes-

Natanyahu les disho: “El puevlo de Israel vos da huersa i vozotros le dash en retorno huersa… el objetivo  de muestra operasyon es de azer retornar estos adolesentes, kada uno a sus kaza respektiva. Estamos azyendo todo muestro posivle, kon esforsos enormes en este eskopo.”

De su parte Sara Netanyahu tambyen adjunto: “Israel en su totalidad esta asperando kon vos el retorno de vuestros ijos.”