Vox Populi Vox Dei: Boz del puevlo boz divina

Klara PERAHYA Judeo-Espanyol
18 Haziran 2014 Çarşamba

La boz del puevlo es soverana… en el sistema demokratiko giado por los myembros del governo en funksyon, son los deputados reprezentantes del puevlo ke eskojen los ke, por un tyempo determinado, seran  sus giadores.

Ansi  fue  en Israel  de la eleksyon ‘al posto de Prezidente’ de Reuven Rivlin, el kual en unas kuantas semanas tomara la suksesyon de Shimon Peres, lo ke no respondia enteramente al dezeo de Benyamin Netanyahu, por kavza de diverjensya de puntos de vista entre el i el kandidato eskojido.

Todavia, aun la situasyon  litijyoza ke egzistiya entre eyos dos, esto no impedyo el Primer Ministre de deklarar lo sigyente İmmedyatamente despues la votasyon: “El puevlo Israelyano eskojo komo prezidente  Reuven Rivlin, ansyano Shefe de la Knesset. Malgrado muestras diverjensyas sovre varyos sujetos, vamos agora meter a parte muestros dezakordos afin de lavorar endjuntos por el byen de muestro payis.”

El motivo real del litijyo no es muy klaro, en todo kavzo egziste varyos puntos de kontradiksyon  entre eyos dos i tambyen una persepsyon diferente del Futuro del Payis:

‘Benyamin Netanyahu’ aksepta munchas vezes, (byen entendido debasho syertas kondisyones, entre las kualas la seguridad absoluta del puevlo İsraelyano) de partisipar a negosyasyones para la kreasyon de un Estado Palestinyano, ‘Reuven Rivlin’por kontra es partizano de un  ‘Grande Israel’ del kual los sivdadinos seran djudyos i palestinyanos. 

Netanyahu  dezea nombrar su payis ‘Estado Israelyano djudyo’… Reuven Rivlin, profundamente demokratiko, es de un avizo  kontraryo… i ansi, sovre munchos otros puntos, los proyektos del Shefe del aktual Governo İsraelyano puedran ser kontraryos a  la manera de pensar del futuro Prezidente de la Republika. 

Es verdad ke la funksyon de Benyamin Netanyahu kedara syempre egzekutiva, kuando la de Reuven Rivlin sera simplemente reprezentativa, su objetivo devra ser de realsar el imajen de su payis i de asegurarle la simpatia i el apoyo  de las potensyas  ajenas.

Vyejo avokato, dunke de formasyon juridika, konsyente de lo ke son los derechos i doveres de kada uno,  Reuven Rivlin  savra por seguro meterse a una syerta distansya mas arriva ke kualkyer diverjensya …Un prezidente deve ser antes de todo una persona de razonamyento; ansi, su rolo no sera de apoyar tal o tal otra  thezis, ma de syempre ayudar a  bushkar una solusyon medyana ke muy provablemente sera la maz serkana de la voluntad popular.

El parlamente israelyano no es muy homojeno en la manera de pensar de sus myembros, lo ke es el propyo del sistema demokratiko... Ansi fue,ay de esto unos kuantos dias, al seno mizmo del governo, kuando ‘Naftali Bennett’ Ministro de la ekonomia avlo de un proyekto unilateral de retrakto o de aneksyon gradual de algunos territoryos palestinyano, deklarasyon a la kuala ‘Yair Lapid’ Ministro de las Finansyas  (apoyado por Tsipi Livni ministra de la Djustisya) salyo absolutamente kontraryo  i mizmo deklaro ke si una sola implantasyon es aneksada de una manera unilateral el governo riska de ser disolvido.

El Dyo ke aklare la vizyon de los dirijentes de todos los payis del mundo i los pushe en direksyon de desizyones  prometozas de muevos premisyos de paz, djustisya i  voluntad de komprensyon mutual.