Aun ke no tengo la kompetensya nesesarya para estudyar minusyozamente una ovra literarya eskrita en Turko, ma por kontra syendo ke la autora me embiyo personalmente kuatro de sus ultimos livros, me permeto de darvos simplemente mi impresyon jeneral sovre eyos, sin pretender azer una verdadera analizis.
En los tres de los kuatro livros ke Reneta Sibel Yolak me mando, entitolados: ‘Ümit Adası ‘(la İsla de la esperansa), ‘Gönül Bahçesi’ (Guerta de sentimyentos afektuozos), i ‘Bir Aşk Masalı’ (Una leyenda de amor), la autora mos avla de diferentes kozas ke mos konsernan personalmente o byen de varyos fenomenos ke persivimos i ke son syempre prezentes en muestro entorno ...
Al empesijo me topi delantre un djenero muevo de ekspresyon ke poko a poko se afirmo muy interesante. Riko de una ancha kultura jeneral, el esprito investigador de la eskritora se interesa a varyos sujetos de los kualos el tema prinsipal es kaji syempre el ‘Ser humano’ i sus reaksyones delantre la kompleksidad de su kondisyon de kriansa sensivle i emotiva, konsyente de sus responsavilidades.
Oy, en el kaos ande bivimos i ande todo es dubyo i inkomprensyon, la vida devino un eternal kestyonamyento al kual no topamos syempre las respuestas adekuadas. Kada individuo kon su propya interpretasyon de los akontesimyetos, es una entidad diferente en su persepsyon del mundo.
Reneta responde de una manera muy personal a este estado de konfuzyon ande evoluamos, en dandomos por empesar sus propyas refleksyones sovre varyos sujetos ansi ke chikos egzyempyos envezes muy simples a entender i kaji syempre yenos de sinyifikasyon, eya tambyen se refera munchas vezes a varyas sitasyones tomadas de ovras de eskritores byen konosidos Turkos komo igualmente ajenos, sin nunka mankar de indikar el nombre del autor.
El kuatren livro ke resivi de su parte, entitolado ‘Yahudi hikayeleri” es diferente, la autora mos avre las puertas sovre un espasyo ke para munchas personas es deskonosido “El mundo djudyo” kon sus uzos i tradisyones, sus karakteristikas i konseptos, i tambyen sus diferentes fyestas, verdaderas ilustrasyones de lo ke bivyeron i pensaron muestros primeros avuelos.
Autora de varyos lavoros anteryores intitolados ‘Mutlu Olmanın Yolları’ (Los kaminos a segir para alkansar la felisidad), ‘Yaşama Sanatı’ (El arte de bivir), ‘Yaşam Mucizesi’ (El milagro de la Vida), ‘Masal Gibi Aşklara’ (Amores semejantes a una leyenda) ,ansi ke ‘Evrensel Aydınlanma Terapisi’, ‘Hayatin Kalbinde kendini Bulmak’ ets..ets eya resivyo multiples premyos, tal “Özel Yazarlar Ödülü” i varyos otros. Eya partisipo de mezmo en İsrael a munchos konkorsos de poezia i muzika en los kualos le fue atribuido tambyen grandes distinksyones de apresyasyon.
Ay ainda munchas kozas a dizir sovre estos kuatro livros, ma kero deshar a los lektores el plazer de deskuvrir i interpretar individualmente las verdades ke eyos kontyenen.