La Fransya esta muy inkyeta del rezultado de la ultima eleksyon de los futuros dirijentes del ‘Komite sentral de la Unyon Evropea’, rezultado ke riska de dar un grande poder al partido politiko ultra-nasyonalisto jeneralmente giado por un terrivle esprito de gzenofobia.
Una grande manifestasyon fue organizada a este propozito por una partida de la manseves franseza, kompuesta de aproksimativamente 8000 jovenes, los kualos klamaron en las kayes, el grande risko ke komporta el fakto de konfiar la jestyon de la komunidad Evropea a una mayoria de individuos rigoristos en la konservasyon absoluta de sus identidad nasyonal al nivel ansestral, sin toleransya por kualkyer intruzyon ajena.
Por seguro ke munchos de entre mozotros tyenen ainda en las orejas el sonido revoltante del byervo “detalyo” kalifikando ansi el terrivle jenosidyo de la segunda gerra mundyal ande 6 milyones de djudyos i miles i miles de bohemyanos pyedreron la vida de una manera salvaje, palavra pronunsyada (unos kuantos anyos antes) por Jean Marie Lepen el mizmo, entonses prezidente i oy padre de la ke se topa a la kavesa del partido ‘Front National’.
Oy, es imposivle de no demandarmos kon anksyedad si la aktual prezidente del mizmo partido “Marine Le Pen” es diferente o semblavle a su padre?
En el korso de una ‘meza redonda’ organizada por la Likra a este sujeto, el historyano Laurent Joly kargado de investigasyones en el CNRS i autor de una tezis sovre el antisemitizmo, insiste ke el partido politiko F.N es syempre peligrozo, el es el heredador direkto del ansyano partido anti –Dreyfus fransez de la fin del dyezimueven siglo, elkual konsiderava los estranjeros ke avian obtenido la nasyonalidad franseza komo enemigos potensyales.
Laurent Joly disho aver rekojido en varyos lugares, bultines de propaganda del partido ‘F.N.’ a la okazyon de la ultima eleksyon departemental, kon sovre kada uno, el mizmo thema sentral: ‘derechos sosyales unikamente a los fransezes’.
A la remarka de uno de los partisipantes ke insistyo ke munchas personas pretenden ke Marine le Pen sivilizo el ‘Front National’, el historyano respondyo:
“Eya sivilizo unikamente el diskorso ma no el objetivo del ‘Front National’.
Visto ke eya dezea kon ardor ayegar al Poder i syendo konsyente kel antisemitizmo es aktualmente konsiderado en Fransya komo un elemento negativo, Marine le Pen elimino los argumentos kontra el djudaizmo i afin de obtener el maksimum posivle de elektore, eya aktualmente se limita a afirmar su thematika sentral: ‘el peligro de la imigrasyon’”.
Ke rezerva el futuro a la komunidad djudia de Fransya i a las de los payizes vezinos? Los dias vinyentes mo lo diran.
