“Komemorasion de la shoa nunka mas-bir daha asla”

Penso ke es un dever de vijitar los muzeos del Olokosto, komo vijitar las tombas de muestros korrelijionarios, por ser judios...

Esti SAUL Judeo-Espanyol
1 Mayıs 2014 Perşembe

Kerida Milli, partisipates a un grupo para vijitar Berlin. Keremos konoser tus sensasiones del viaje en Alemania.

Kerida Esti, estuvimos en Berlin djuntos kon un grupo, durante 4 dias. Te puedo dizir senseramente ke nunka kije ni ver ni konoser la Alemania.

Del momento ke desidi de ir a Berlin i ke aksepti de partisipar al grupo, sin mintiras, me arrepenti...

Berlin es un lugar inkreivle komo mis sentimientos, un lugar intrafikado: Berlin sud, Berin Este, Berlin viejo, Berlin moderno, Berlin nazi, Berlin Judio...

En los otobuses o en las kayes, echando pasos mos estuvimos demandando: “Ande estamos? En el este o en el sud? Een el viejo o moderno?” No pudimos saver mizmo fina el dia de alkavo desbaranyar ande mos topavamos...

Algunas del grupo toparon ke la sivdad no tenia alma; las otras triste, i otras se emosionaron de konoserla... Ma malgrado todo, vale la pena de vijitar i konoser Berlin.

Mos fuimos, vimos, tokimos i kada punto i ora la bivimos esta sivdad. Mos peryimos en los labirentos del Monumento del Olokosto. En el Muzeo del Olokosto partajimos kon amertuma muestros sentimientos i lo ke resentimos delantre los kampos de konsentrasion i yorimos djuntos de ravia. Delantre los ornos, muestro grupo de 33 personas, mano kon mano, izimos una orasion por las almas ke peryimos. Kayadikas, sin azer oyir muestras bozes, estuvimos echando chiyos.

Mi propria opinion es ke la komunita Judia no puede efasar de su esprito el Berlin, ni el Hitler, ni el Nazismo.

Vos konti mis sentimientos, no me miresh a mi...

Grasias, Milli, por tus sinseros sentimientos.

Es fasil de dizir: “No kero ver, me se apreta la alma i el korason”. Mizmo si se melda muncho por este sujeto,.es otro de ver. Si vijiti el Muzeo del Olokosto en Israel.i en Washingto, absolutamente kero ver lo ke fraguaron en Berlin para ekskuzarsen...

Realmente, ay de kuando ke kero konoser este muzeo, i si no era la ekspozision de Barcelona, ivamos estar djuntos.

No mos vamos a olvidar nunka de esta maldicha, orrivle desgrasia! Devemos de transmeterlo a muestros inyetos...

Vamos a asender i este anyo en el Kal de Neve-Shalom, las kandelas para la grande peryita de muestros korelijionarios, ke repozen en paz.

Kero rengrasiar por el lavoro perfekto ke los jovenes de muestra komunita prepararon, para no azer olvidar el OLOKOSTO, komo kada anyo.

Los jovenes de ALEF mos onoran, son ekstraordinarios!

NUNKA MAS - PLUS JAMAIS - BİR DAHA ASLA - NEVER AGAIN...