Olas de amenazas sovre la Fransya

Klara PERAHYA Judeo-Espanyol
19 Mart 2014 Çarşamba

Segun lo ke meldi en la Prensa: ‘Amenazas empapadas de ravya de parte de nebulozas djihadistas, por  aver ayudado militarmente populasyones kristyanas en la Afrika sentral (Centre Afrique), obskuresen en este momento la atmosfera de la Fransya’.

De otra parte , se ve tambyen poko a poko “el ideal djihadisto” desveloparse en el payis de Descartes i  Viktor Hugo, komo un djenero de desfio opozado al adelantamyento oksidental i partikularmente komo una negasyon de lo ke mozotros yamamos ‘sivilizasyon’.

De dia en dia puja mas el shifro de mansevos aedados de 15 a 30 anyos, nasidos en Fransya, por la mas parte desendyentes de paryentes magrebinos (ma entre los kualos figuran de mezmo muevos konvertidos) ke parten por la Siria para kombatir djuntos kon los grupos djihadistos, no solo en el eskopo de luchar kontra un diktador krual ma en el buto de  kumplir el objetivo prinsipal de esta sekta ke es ‘de konvertir todos los ombres al Islamizmo İntegral de los primeros tyempos’, en la totalidad de una doktrina desnuda de todo lo ke la eksperyensa de los siglos sigyentes pudo adjuntar.

El sityo ‘Europe 1’  resivyo a este sujeto el testimonyo de un djihadisto aedado de 30 anyos, de nasyonalidad franseza, ke djustamente partyo por la Siria para luchar, debasho el pseudonimo ‘Abou Shaheed’ en una de las seksyones las mas radikales de la sekta.

El  deklaro: “mi objetivo es el kombate, unikamente el kombate... Lo ke dezeamos para la Siria es ke eya sea governada por las Leyes de Allah... Muestra lucha  es una lucha entre el Islam i todos los otros sistemas governomentales... Para mozotros ‘Venir luchar aki’ es un akto unikamente espiritual”...

De kualo se kompoza i a kualo se refera, esta kreensa muzulmana ke no aksepta la mas chika evolusyon ni aze ninguna konsesyon a los imperativos de la epoka aktual? Asta poko tyempo antes esta entidad relijyoza kedava enserrada en sus limitas puramente teorikas, ma aktualmente eya paso a la aksyon

Es vedra ke  todas las relijyones tyenen semejantes grupos de kreentes intransijentes enfohados en el respekto absoluto de la literalidad de tekstos ansyanos, ma ninguna otra  emplea esta arma entre todas la mas fuerte, lakuala es de inkulkar en el esprito de los kombatantes ‘el dezeo insurmontavle de murir para devenir martiryo’ kon la konviksyon inebranlavle de avrir ansi  las puertas de la immortalidad.

Kualo puedra en el futuro venser esta manera de pensar? Ningun simple mortal  (kuala sea su fey)  puede kombatir sin espanto kontra semejante adversaryo o akometerse sin peligro de  inkulkarle ‘una vizyon del mundo’ mas humana  i mas rasyonal, salvo (puede ser) uno de estos grandes Savyos Muzulmanos unanimamente respektados de parte de todas las relijyones, porke  atados simultaneamente a la espiritualidad de sus Fey i tambyen a la valor inkontestavle de la Vida.

En desparte de estas  amenazas ke (komo fue dicho mas arriva) obskuresen la atmosfera de la Fransya,  djestos o palavras de rasizmo i  antisemitizmo al seno mizmo de una partida  de la populasyon otoktona devino un real problema para el Governo aktual de este payis.

No se puede nyegar los esforsos de Manuel Valls (Ministro del Interyor) a este sujeto, sostenido por varyos kapos relijyozos Muzulmanos komo tambyen Kristyanos i Djudyos ke luchan desde un largo tyempo en favor de un dialogo bazado sovre la voluntad de una komprensyon  resiproka, ma  malorozamente  egziste ainda en la vyeja Fransya rural i en varyos sistemas politikos ekstremistos, restos de este antiguo menospresyo por la populasyon de konfesyon djudia, al kual aktualmente se meskla igualmente el desdenyo por todo lo ke no es Evropeo.