Parafrazando las palavras del Eklezyasto, se puede komo syempre dezir: “Ay un tyempo para el menospresyo i un tyempo para el elojyo... un tyempo para la humilyasyon i un tyempo para la glorifikasyon”.
Ma desharemos la epoka Biblika i retornaremos a la aktualidad: Ay unos kuantos dias de esto, meldimos en la Prensa Franseza i tambyen en munchas otras gazetas estranjeras, ke el magazin “Le Parisien” realizo un sondaje(sondeo) en el objetivo de azer una komparasyon entre el aktual prezidente del Governo Fransez “François Hollande” i 14 otras personalidades politikas byen konosidas, entre las kualas figurava tambyen el nombre de Dominique Strauss Kahn.
El rezultado obtenido fue muy sorprendyente, lo ke provablemente es la kavza real por la kuala la direksyon del Magazin ‘le Parisien’ konsidero este sondaje komo una simple enkuesta ‘no ofisyal’.
Entre las 14 personalidades prezentadas; ‘Dominique Strauss Kahn obtuvo 56% de bozes favoravles’, ‘Alain Juppé 52%’, ‘Nicolas Sarkozy 49%’, i ‘Manuel Valls 48%.’
Despues los dramatikos evenementos del hotel Sofitel en data del 14 Mayo 2011, esta enkuesta es la primera (echa en Fransya) ande el nombre de Strauss Khan fue sometido a un semejante testo.
Kuala es la kapasidad real de djuzgamyento de lo ke yamamos ‘la opinyon publika’, la kuala jeneralmente es fluente i muy versatil segun las sirkunstansyas ?
Es difisil de responder a esta kestyon, ma portanto es sovre eya ke la mas parte del tyempo son bazadas munchas desizyones i de mezmo munchos djuzgamyentos favoravles komo desfavoravles.
En el kavzo del akontesimyento en el Hotel Sofitel de New York, ‘lo ke provoko una atmosfera kaji trajika’ no fue el fakto de aver konvokado el prezidente del İMF a prezentarse delantre un tribunal a la sigida de una kesha kontra el, (todos savemos ke delantre la Djustisya la İgualidad entre todos deve ser absoluta) lo ke realmente fue dramatiko es sovre todo la manera en la kuala el evento fue prezentado, la insistensya a konsiderar Dominique Strauss-Khan komo kulpavle antes kualkyer djuzgamyento, sin aplikar la prosedura lojikamente nesesarya en semejantes sirkonstansyas.
Se oyo entonses sonar komo un djenero de “hallali”, este grito de los kasadores ke ya es el momente de abatir la bestya persigida, la kuala esta vez era una kriansa humana.
Es ke Dominique Strauss Khan es syempre de una kondukta irreproshavle ? por seguro ‘No’. Ken lo es realmente? ... Komo todo modo de persona, el tyene sus defektos, i puedeser perpetro ‘aktos de ekseso seksual’ inadekuados a la pudor, loskualos portanto nunka asta este dia, fueron konfirmados por un kualkyer organo judisyal.
En el djuzgamyento de un akto kulpavle , el primer elemento a tomar en konsiderasyon es antes de todo la verasidad de la akuzasyon, komo tambyen la natura i el grado de gravidad del delito.
En este dia de Shabat del anyo 2011 ande se paso el drama del hotel Soffitel en los Estados Unidos, ‘las fotografias (en la prensa kaji mundyal) de Strauss Kahn, las manos atadas detras la espalda, arrastado en las kayes por dos polisyeros, sin ainda aver sido djuzgado, sin la konfirmasyon de kualkyer testigo okular ni prova real, sovre baza unikamente de la deklarasyon de una mujer’ son a eyas solas la prova de una prosedura judisyal defisyente .
De retorno en Fransya su propyo payis, una serie de prochesos por ‘tentativas de agresyon seksual’ fueron avyertos de parte de varyas personas kon un retardo de 6 o 7 anyos, sin ke ningun de entre eyos resiva kualkyer konkluzyon de kondanasyon de parte de un tribunal.
El 18 del mez de Mayo 2011, en esta mizma pajina, me akodro aver eskrito lo sigyente:
“Deke derecho arrebashar un inkulpado ke no fue ainda ni oido ni djuzgado? Deke derecho kondenarlo sin aver echo una verdadera enkuesta? No digo esto solamente por ke se trata de Strauss Khan, esto lo digo por todos los akuzados rikos komo proves, por los oksidentales i igualmente los azyatikos o afrikanos...
Por seguro ke todos deven pagar el presyo de sus faltas, ma ninguno deve ser humilyado. İnnosente o kulpavle, el prezidente del F.M.I. es uno de entre eyos, un ombre kon su dinyidad, su orgolyo, su fuersa komo tambyen su debilidad, un ombre ke se pudo yerrar komo kada uno de entre mozotros lo puede...” (fin de sitasyon)
Estas palavras las mentengo syempre.
