El Ministro Amerikano de la Djustisya anunsyo ke la Pena de Muerte sera demandada kontra Djokhar Tsamaev

Klara PERAHYA Judeo-Espanyol
5 Şubat 2014 Çarşamba

El ministro Amerikano de la Djustisya Eric Holder anunsyo djueves pasado el 30 Enero 2014 ke aun la abolisyon de este suplisyo punitivo en el Estado de Massashusetts, ‘la pena de muerte’ sera demandada (sovre baza de la Ley Federal)  kontra Djokhar Tsamaev, akuzado de aver  (en djuntos kon su ermano) aparejado i perpetrado el atentado de Boston del mez de Abril pasado, ke kosto la vida a tres personas i desho 264 feridos entre los kualos munchos kedaran infirmos por syempre.

Ke pudo pasarse en la kavesa de Djokhar Tsamaev para aparejar i perpetrar kon sangre fria un akto asasino de semejante dimensyon? Migrante a los Estados Unidos desde kaji su adolesensya, byen adaptado al ambiente eskolaryo Amerikano, buen elevo, buen kompanyero de klasa i mas tadre estudyante performante en Medikeria, el no tenia ningun motivo de revolta o de deskontentes i su futuro se anunsyava briyante.

Eske el merese absolutamente la pena de muerte? Munchos altos Juristos Amerikanos toparon ke ‘si’; antes de todo la sovreguardya de la populasyon lokal lo egzije i de mezmo la triste nesesidad de utilizar  semejantes medyos disuazivos afin de arrestar las olas de kriminalidad propajadas por nebulozas enfohadas en un dezeo loko de someter brutalmente el mundo a sus ideal de ‘negasyon de kualkyer progreso’ i a sus obedyensa syega a preseptos problematikos ke puedran figurar en sus kodigo relijyozo.

İnkontestavlemente, los tyempos trokaron las kondisyones de vida i ansi de djuzgamyento, me akodro el sospiro de rekonforto ke mis amigos i yo aviamos tenido ay de esto unas kuantas dekadas, kuando aviamos meldado en la prensa “la abolisyon de la pena de muerte en Fransya” prekonizada por el Ministro de la Djustisya de la epoka Robert Badinter.

Al empesijo mas de la mitad de la populasyon estava kontra esta desizyon, ma el ministro, grasyas a su profundo  poder de refleksyon i su retorika adekuada, supo konvenser munchos de los refraktaryos i ansi avyo una era mueva de humanizmo i de real sivilizasyon en el kampo del egzersizyo  juridiko.

Munchos de sus partizanos tenian la konviksyon ke kuala fuera la gravidad del akto de kulpabilidad, ningun djuzgo  tenia el derecho de pronunsyar un sentensya de muerte al lugar de un veredikto de ‘enkarselamyento a vida’ ke desha avyerta para el kulpavle la puerta  a  una posivilidad de arrepentimyento.

Ma oy en dia, en el kaos inekstrikavle de la epoka prezente ande entitades politiko- relijyozas prekonizan sin el mas chiko eskrupulo  la muerte, la humanidad se  topa en un espasyo de dubyo.

Oy bivimos en un mundo ande los kriteryos trokaron, ande las reglas i las normas de djuzgamyento  se desferensyan de las ke eran imperativas ay de esto unas kuantas desenias.

İ portanto es oy ke se apareja lo ke sera el futuro.