Tadrada de umor Sefaradi

Esti SAUL Judeo-Espanyol
29 Ocak 2014 Çarşamba

Tengo el plazer de kontar en kurto la tadrada de oy, Alhad el 26 Enero. En los salones del Neve-Shalom, muestro kal, de las 5 a las 7, pasimos dos oras de alegria. Se fiesto un otro dia de ladino maraviyozamente, ke realizo perfektamente el buto de trasmeter las tradisiones i azer arebivir de una manera karikatural el modo de bivir de los Judios Sefaradis de Estanbol.

Kon el arte se enrikese la vizion de la vida. Es un kamino ke mos yeva a deskuvrirmos a mosotros mismos... Es un arte importante de saver azer riir un salon yeno de personas ke apresian i konosen la lingua.

Pablo Martin Asuero, el direktor del Instituto Cervantes, kon su fizionomia elegante, estuvo presente - un amigo de grande valor ke no manka de onorarmos a kada okazion... Ke no mos manke! Tomo la palavra i mos felisito...

Karen Şarhon mos alegro kon su saver kontar anegdotas i kantar kon su boz i personalita luzya.

La nombro a Matilda Koen Sarano kon los kuentos de su livro...

Eliezer Papo, un “intellectuel chansonnier” mos enkanto... Ke ermoza sorpreza de verlo en Estambol! Munchas grasias...

Jojo Eskenazi, muestro “Danny Kaye” es un komik ke se surpasa kon sus espritos i mimikas proprio a el mismo. Me vino las lagrimas tanto mos izo riir...

Un grande rengrasio al Instituto Cervantes i al Sentro Sefaradi por la organizasion i la reushita de la funksion.