Meldi una artikolo i vide un video sovre la komunidad Papua New Guinea ke me surprendo muncho. Los papues kantando la orasion Shema İsrael en sus tradisyonal forma, estava koza de ver: sienes de ombres vistidos de paja i plumas, lanzo (mızrak) en la mano, alevantando las manos al sielo, i arogando komo aziyan los antepasados ebreos.
Estos ombros primitivos, apartienen a la tribu Gogodales ke biven en la provensia oksidental de Papua New Ginea. Lo ke komen es pishkado, kangurus, i plantas ke topan en la natura. La majorita no saven ni meldar, ni eskrivir. Ma, kuando viyajan en la sivdad se visten modernos vistidos.
Tony Waisa, el shef de la tribu, tiene un kuento en Yahoo, i avla en İngles. Waisa, un diya, topo el nombre Profesor Tudor Parfitt en el İnternet. Parfitt es un sientifiko de la Universidad de Estudios Orientales, i Afrikanos en Londra. Waisa meldo ke el profesor deskuvrio ke la komunidad Zemba ke biven en Zimbave, tiene una relasion jenetiko kon los judyos.
Tony Waisa kontakto el profesor, i le propozo ke les agan los mezmo testes. El shef de los Papues le embiyo un punyado de kaveyos de los miembros de su komunidad. Parfitt se fue a konoser a los papues. El fue resivido kon festivales, la estreya de David pintadas en las frentes de los ombres, la bandiera de İsrael en las manos, i kantando kantikas de İsrael.
Ma, segun los rezultados de los testes, no se topo orijin semitiko en los papuos. Malgrado el rezultado, esto no les izo dinguna diferensia. Noventa por sien de los miembros del tribu, tienen una amor grande por el judaizmo, i keren enstalarsen en la medina.
Yom Hatsmaut, por egzamplio, en el diya ke los israelianos komemoran el aniversario de la independensia del estado, miles de papues pasan en las kalejas de la sivdad, kon bandieras de İsrael.
La delegasion de los Gogodales vijitaron İsrael, i sus primer objektivo fue de vinir, i ofrir sus oros al Templo de Yerushalaim. Ma, el governo de İsrael no se entereso del todo kon los Gogodales.
De ande viene el orijin de la relasion de esta tribu tan leshos en el Pasifiko, i la tierra de los judyos? Una repuesta puede ser, de la influensia de los misioneres kristianos. Estos misioneres estuvieron en el Pasifiko entre la primera i la segunda gerra mondial. El viejo testamento puede ser ke los enfluensio a los papues.
Otruna probabilidad puede ser ke estos primitivos son de una tribu pedrida en el Pasifiko. Estos pueden ser desedientes de esta tribu pedrida porke algunos entre eyos paresen muncho a los judyos.
Enfluensias relijiozas en las tribus del Pasifiko son munchas. Los papues estan estudiando las orasiones, los semboles, i los saludos judyos. Por egzamplio, se saludan diziendo Shalom. En los viajes ke azen a la medina, se ambezan las orasiones, i los rituales judyos. Ma, malorozamente, no ay datas para verifikar si de verdad egziste alguna relasion kon el judaizmo.
