Vyernes pasado el 10 del mez koryente Ariel Sharon serro definitivamente sus ojos a un mundo ke (kon o sin razon) no fue syempre klemente kon el.
Komo lo disho su rival politiko de syempre Binyamin Netanyahu, Ariel Sharon fue un grande Soldado. De su parte Tzipi Livni pronunsyo las palavras sigyentes: “Dizen ke los vyejos soldados no mueren nunka ma dezaparesen. Arik Sharon dezaparesyo ay de esto 8 anyos i oy le dizimos A Dio por syempre”.
En efekto, el fue antes de todo un grande Soldado i un implakavle defensor de su payis. El fue en mizmo tyempo alavado i kritikado, simbolo de una lucha sin limite por su puevlo ke en el pasado fue kontinualmente entornado de menospresyo i ke sin piadad fue arrastado durante dos milenaryos de lugar en lugar, ferrido en sus karnes komo tambyen en su dinyidad.
Segun lo ke dize la prensa, nasido en Palestina en 1928, Ariel Sharon devino myembro de la Hagana (organizasyon militarya sionista klandestina) a la edad de 20 anyos i ansi partisipo a la primera gerra Israelo-Araba.
Durante la gerra de Kippur en 1973, el i su armada reusheron a traversar el Kanal de Suez i a entornar las fuersas militaryas de Ayifto, lo ke permetyo la viktorya de Tsahal.
En 1977, elijido Ministro de la Agrikultura, el permetyo una syerta ekspansyon de las implantasyones djudias en los territoryos Palestinyanos.
En 1982 responsavle del Ministeryo de la Defensa, su armada okupo el Sud del Liban en el eskopo de protejer el Norte de Israel, okupasyon ke devia inisyalmente turar un muy kurto tyempo ma ke se prolongo kaji 18 anyos, periodo durante el kual se produzyo en Sabra i Shatila el muy triste epizodyo del masakro de una aglomerasyon de refujyados palestinyanos, perpetrado por milisyas kristyanas libanezas.
En Israel mizmo400.000 personas protestaron en las kayes para denunsyar este masakro, i mizmo una enkuesta Israelyana fue echa ke konkluo a la kulpabilidad direkta de los falanjistos kristyanos i a la responsabilidad indirekta de Ariel Sharon por no aver defendido la populasyon de un territoryo ke se topava debasho su guardya, lo ke ovligo el grande Soldado a alesharse por un largo tyempo de la aktividad politika.
Esto dicho, muncho mas tadre, en el anyo 2001 Sharon devino primer Ministro de Israel i poko despues, a la sigida de la segunda intifada i de los numerozos atakes-suisidyos ke metian su puevlo en situasyon de grande perikolo de vida, el interrumpyo las negosyasyones kon la Autoridad palestinyana i empeso la konstruksyon de una pared de separasyon entre Israel i la Sisjordania afin de impedir kualkyer infiltrasyon enemiga.
En 2005, el desidyo de suprimir las kolonias Israelyanas de Gaza i de meter fin a kuyalkyer prezensya militarya de Israel en este territoryo.
Ke era su objektivo final? Ninguno puedra responder realmente a esta kestyon; poko despues, en el anyo 2006 viktima de un golpe serebral el fue konektado a makinas ke lo izyeron bivir vejetativamente durante 8 anyos.
Lunes el 13/1/2014 una seremonia komemorativa fue organizada en la Knesset antes los funerales militaryos en prezensya de grandes delegados de varyos payizes.
Ke su Alma repoze en paz. Su Nombre sera syempre eskrito kon letras luminozas en la Historya del Estado de Israel.
