LOS AMERIKANOS MAS ANTISEMITES KE İSLAMOFOBES
Se avla de 40 milyones de antisemites en los Estados Unidos, konsekuensa puede ser de la kompozisyon mas o menos heteroklita de la populasyon inisyal, agravada por una migrasyon kontinual klandestina de desmazalados de la Amerika del Sud komo tambyen (en mas chika kuantidad) de otros kantones del mundo, ke fuyen la mizerya de sus payiz respektivo, situasyon a la kuala se adjuntan igualmente las kreensas relijyozas obskurantistas de personas ke kedaron syegas a la evolusyon de la syensya i en laskualas el antisemizmo es syempre profundamente enklavado en sus tradisyones, ombres i mujere enkavenados a preseptos medyevales i a una salvaje severidad kontra el puevlo supuesto ser el asasino de sus profeta Jesus; ombres i mujeres ke refuzaron de evoluar en sus pensamyento, sodros a las palavras del Papa Jean 23 de bendicha memorya, el kual avyertamente avia refuzado la kondenasyon i el aborresimyento i avia eliminado de los ansyanos tekstos kristyanos las horrivles palavras: “puevlo djudyo deisidyo”.
Oy en dia, muncho amerikanos akuzan tambyen los sitizanos djudyos de ser mas atados a Israel ke a la Amerika i blaman mizmo syertos responsavles governomentales kristyanos, akuzandolos de ser fokalizados sovre los problemas de seguridad del Estado Hebreo, sin a ningun momento tomar en konsiderasyon ke se trata de un payis entornado de puevlos enemigos ke van mizmo asta amenazar de erradikarlo de la karta jeografika.
A esto se adjunta igualmente el shifro muy alto de migrantes ansyanos komo relativamente resyentes de diferentes orijenes ke no parvyenen a adaptarsen enteramente al nivel kultural i ekonomiko de los Estados Unidos i syenten en eyos un terrivle selo empapado de odyo por los djudyos ke reusheron, eyos, a integrarsen kaji enteramente al nivel del payis, asta mizmo ser konsiderados komo muy performantes.
Segun lo ke disho Abe Foxman direktor de la ADL durante una intrevista ke el akordo a la gazeta İsraelyana Ha’Aretz:
“El antisemitizmo en los Estados unidos es muncho mas virulente ke la İslamofobia. Al pareser, ay 10 vezes mas de aktos hostiles perpetrados kontra la komunidad djudia ke kontra la populasyon muzulmana. Mizmo despues el triste akontesimyento ke kosto la vida a unas kuantas personas en Boston, no se vido ninguna manifestasyon negativa kontra la aglomerasyon muzulmana eya mizma.”
LA ENSENYANSA DE LA SHOHA EN İSRAEL A LAS PRIMERAS KLASAS ESKOLARYAS
En Israel, las opinyones sovre este sujeto son diferentes las unas de las otras i mizmo envezes kontraryas las unas a las otras…
Los unos pensan ke partikolarmente en İsrael payis ekspozado a varyos riskos i amenazas, todo modo de sitizano chiko o grande deve ser pronto a defenderse fizikamente i intelektualmente, lo ke nesesita una konosensya total de su historya yena de angusyas i masakros kolektivos indo de la inkizisyon, komo tambyen de los progromes i partikolarmente del inhumano jenosidyo de los djudyos debasho la dominasyon nazi. (lo ke de primera vista kontyene un djusgamyento muy rasyonal)
Otros por kontra dizen ke kuando se trata de ninyos de las primeras klasas eskolaryas, ay reziko de un tromatizmo psikolojiko( lo ke provablemente es tambyen a tomar en konsiderasyon).
Puedemos anyadir ke la koza la mas importante es de parvenir a komunikar la konosensya historika de estos dolorozos eventos i mizmo de desvelopar la nesesidad de estar syempre en estado de alerta, todo en evitando de inkonsyentemente inkulkar a los ninyos djudyos i partikolarmente İsraelyanos ‘sentimyentos de odyo enverso los otros’.
La koza es por seguro muy difisil a realizar…inkulkar el respekto del otro, mizmo si este otro puedra ser un dia un antagonisto, todo en syendo personalmente muy akavidozo, i ‘guadrar ansi syempre la puerta avyerta a la posivilidad de un aserkamyento amigavle kon el ke se prezenta komo enemigo’.
Komo lo disho Budha:“El odyo no puede venser el odyo…solo el amor lo puede”.
ANTAGONIZMO AL SENO MIZMO DEL GOVERNO İSRAELYANO
Alhad 6 desembre, el ministro İsraelyano de las Finansas Yair Lapid shefe del partido sentristo “Yesh Atid” se ekspreso sovre la importansa de las negosyasyones İsraelo- Palestinyanas i izo entender ke la koalisyon israelyana sera mas performante a este sujeto sin la prezensya del partido HaBayit HaYehoud.
UN EVENTO MUY MUY TRISTE I DESPLAZYENTE
La Prensa mos ambeza igualmente ke la Organizasyon Karitativa Magen David Adom (ekuivalente İsraelyana de la kroche kolorada i del Kreshente Kolorado) refuzo Myerkoles el 11 Desembre el dono de sangre de la deputada djudia de kuero bruno “Pnina Tamano-Shata” orijinarya de Ethiopia, myembro del Partido Israelyano Sentristo Yesh Atid.
Una responsavle del dicho organizmo sanitaryo ekspliko ke segun las direktivas del Ministeryo de la Salud (por espanto de mikrobyo de Sida) no se aksepta la sangre de personas Ethiopyanas ke no son nasidas en İsrael; fakto ke provoko una grande polemika en el payis.
El Primer Ministro Benyamin Netanyahu yamo immedyatamente la deputada “Pnina Tamanon-Shara” para asegurarla de su inyoransa prealable del fakto i ekspresarle su admirasyon por el lavoro ke eya produze ansi ke sus regretos por el insidente en kestyon...
